A Garda Civil confirma a versión da vítima da agresión machista de Vimianzo
VIMIANZO
Os axentes vinculan a Javier Miñones Trillo na agresión sufrida pola súa exparella
25 novs 2022 . Actualizado ás 18:37 h.A segunda xornada do xuízo iniciado o luns contra Javier Miñones Trillo, o vimiancés acusado de ter asestado cinco coiteladas á súa exparella Montserrat López Mosquera, serviu para que os investigadores e axentes que acudiron á sede de Unións Agrarias desmontasen a versión de autolesiones ofrecida polo sospeitoso o luns na Audiencia Provincial.
Dous gardas civís declararon onte que sobre as nove da mañá do 15 de maio do 2019, un home acudiu moi nervioso ao cuartel vimiancés para solicitar axuda urxente, tendo en conta que unha muller se atopaba ensanguentada en plena rúa debido a unha agresión. Os dous uniformados acudiron á sede de Unións Agrarias, situada a uns 200 metros do cuartel.
Ambos relataron o dantesco escenario que se atoparon: «Había unha muller tirada no chan, coa cabeza apoiada contra a parede e o canlón. Estaba bañada en sangue. Apartámoslle o pelo para saber por onde sangraba e foi ao chegar ao pescozo cando lle vimos a ferida», relatou un uniformado, quen engadiu: «O primeiro que dixen é que se trataba dun intento de asasinato. A muller estaba moi mal: non reaccionaba, balbuceaba e logo se desmayó. Tivemos que taponar a ferida porque se desangraba. Poucos minutos despois chegaron os sanitarios e atendérona». O outro axente indicou que non recoñeceu á vítima, á que coñecía de vista, ata que lle limpou un pouco a cara: «Estaba tan ensanguentada que non a recoñecín».
A preguntas da acusación popular, exercida por Félix Porto Serantes, os axentes tiveron claro que se non chegan a realizar os primeiros auxilios «a muller morrería». Tamén deixaron claro que pola forma na que se produciron os cortes no pescozo, non se trataba de autolesiones. Un deles argumentou as súas palabras: «O coitelo habíase partido e iso implica ter actuado con moita forza», algo que non debería producirse cando Montserrat López presentaba cinco feridas por arma branca.
Os dous axentes do posto de Vimianzo relataron que o coitelo, partido en dous, e localizado nunha esquina da aula de formación, lugar onde supostamente se produciu a agresión, pertence ao mesmo xogo achado na vivenda do acusado. Outro dato que chamou a atención na sala é que os investigadores localizaron no piso de Javier Miñones o seu teléfono móbil, apagado, a súa carteira e un expediente sanitario psiquiátrico do Chuac «perfectamente visibles e colocados».
Cos testemuños de forenses e axentes deuse por finalizada a vista por esta causa. Fiscalía mantén a petición de 14 anos de prisión e 17 de orde de afastamento. A acusación particular e popular, exercida por Pedro González Boquete e Félix Porto Serantes, respectivamente, manteñen os 16 anos de cárcere e 20 de afastamento, mentres que a defensa, exercida por Joaquín Martínez Camacho, pediu a libre absolución e, alternativamente, un delito de lesións con atenuante (2 anos de prisión) ou intento de homicidio, «a só cinco anos de prisión».