A Laracha, Muxía e Malpica súmanse aos concellos que conxelan as taxas e atrasan o pagamento de impostos
MUXÍA
En Vimianzo, a alcaldesa, Mónica Rodríguez, anunciou a posta en marcha dunha liña telefónica para prestar axuda psicolóxica
27 mares 2020 . Actualizado ás 05:00 h.Carballo, Cee... Os concellos da Costa da Morte adoptan medidas fiscais para apoiar ás economías domésticas e ás empresas afectadas pola crise sanitaria. Ponteceso decidiu demorar algúns impostos, como o de vehículos de tracción mecánica, aos que se habían sumaron previamente Carballo, Cee, Coristanco... Agora son A Laracha, Muxía e Malpica os que inclúen medidas flexibilizadoras.
O Concello larachés, co alcalde, José Manuel López á cabeza, aprobou onte o adiamento do cobro do imposto de circulación. De forma paralela, o executivo local abriu a porta á redución da parte proporcional da taxa do lixo durante o tempo que dure o estado de alarma. Desta medida beneficiaríanse aqueles comercios e empresas obrigadas a cesar na súa actividade. Tamén acordou o goberno local instar a Federación Galega de Municipios e Provincias (Fegamp) a estudar unha proposta de diminución ou adiamento no cobro doutros tributos municipais para que estas medidas se poidan efectuar de forma coordinada en toda Galicia.
En Muxía, o alcalde, Iago Toba, anunciou que o Concello paralizará a tramitación das taxas polos servizos municipais suspendidos: deportes e cultura. E en Malpica, o equipo de goberno local decidiu devolver o pagamento das taxas en materia deportiva durante o mes de marzo, «comunicándolle aos usuarios que non procede o cobro da parte proporcional das mesmas», explicou o alcalde, Walter Pardo.
E en Vimianzo, a alcaldesa, Mónica Rodríguez, anunciou a posta en marcha dunha liña telefónica para prestar axuda psicolóxica: 673 427 498.
Desinfección de colectores na Laracha
Como no resto de concellos, o da Laracha continúa co plan de limpeza e desinfección de rúas, avenidas e espazos públicos. Tamén, e en colaboración con Protección Civil, leva a cabo un plan de desinfección de colectores. Na imaxe, no lugar da Fraga, Soandres.