O Concello de Muxía busca facer un censo de persoas que teñan viaxado recentemente co Imserso
26 mares 2020 . Actualizado ás 05:00 h.Muxía. O alcalde, Iago Toba, solicitou onte a axuda de Policía Local e de Protección Civil para realizar un censo de persoas en todo o termo municipal que, recentemente, teñan viaxado co Imserso. Os encargados destes traballos van piso por piso e casa por casa solicitando datos persoais, números de teléfono de contacto e comprobando se hai persoas que presentan sintomatología compatible coa do COVID-19. O obxectivo, tal e como explicou onte o rexedor, é que dada a escasa información facilitada polas autoridades sanitarias, o Concello desexa ter unha listaxe propio e actualizado para axudar a estes veciños a que queden nas súas casas durante a corentena. O Concello, pola súa banda, colaborará, na medida do posible, na realización da compra de alimentos e na adquisición de medicamentos nas farmacias.
Zas. O rexedor, Manuel Muíño, anunciou onte que o Concello facilita un número de teléfono, o 981 708 303, de 9.00 a 14.00 horas de luns a venres, para coñecer de primeira man «e como medida preventiva» se hai novos casos de coronavirus, se hai veciños que recentemente viaxaron por conta propia ou ben a través do Imserso e coñecer o seu estado de saúde. O Concello de Zas leva a cabo esta iniciativa porque, segundo o alcalde, apenas hai información por parte de Sanidade respecto diso.
Ponteceso. Costa CX. O empresario Álvaro Domínguez puxo en marcha unha iniciativa. «Habilitamos 50 prazas dunha hora de consultoría para poder axudalos e ver como o seu negocio se pode beneficiar da mercadotecnia dixital unha vez pase esta situación. O que intentamos con esta iniciativa é facer ver ás empresas que non necesitan estar coa porta aberta para seguir en contacto cos seus clientes ou posibles clientes». Os interesados só teñen que acudir, de forma gratuíta, á web www.costacx.com ou ben á ligazón https://bit.ly/covid19-costacx.
Costa da Morte. Os alcaldes continúan coas súas reunións diarias cos traballadores dos diferentes departamentos técnicos para seguir cos plans de traballo para esta semana. Os prioritarios son os de seguimento e axuda, xunto con Servizos Sociais, a persoas maiores que residen soas e non dispoñen de medio de transporte propio e tamén de apoio a persoas dependentes. De forma paralela, os concellos continúan co plan semanal de limpeza e desinfección de rúas, avenidas, accesos a supermercados e farmacias e en edificios públicos para combater o COVID-19.
Cee. O Concello iniciou onte unha nova acción cos veciños para facer «máis levadeiro» o estado de alarma e o confinamento. Ás peticións musicais que se escoitan cada día sumaranse agora felicitacións personalizadas aos nenos que estean de aniversario. Diso encargarase a Policía Local, que xa comezou onte con tres pequenos que recibiron, por sorpresa, a visita da patrulla, que entoou desde a rúa o «Aniversario feliz. «Cremos que é unha iniciativa bonita, coa que pretendemos que estes nenos se evadan do contexto que nos toca vivir», sinalou a alcaldesa, Margarita Lamela.