O popular creador, con obras xa en Baio, Carballo ou O Couto, está a pintar na localidade por iniciativa municipal
03 ago 2021 . Actualizado ás 05:00 h.A arte urbana segue tomando rúas e inmobles da Costa da Morte. Un dos proxectos máis recentes está en Malpica, onde o artista Yoseba MP (Joseba Muruzábal), ao que moitos coñecen polas súas «superavoas», está executando unha obra na parede dun edificio de seis plantas situado «nunha localización incrible», xusto enfocando a vista cara ao Atlántico e as Sisargas. Para Malpica non é descoñecida esta idea de mudar a aparencia a través da creatividade: foi un dos primeiros concellos da zona en apostar polo tratamento artístico de espazos degradados, pois o proxecto Pintar na Rúa, aínda vixente, arrincou xa no 2014. Leste, no entanto, é outro formato.
Yoseba MP, que iniciou o seu traballo o luns e contaba onte pola tarde con telo listo nun par de xornadas, explica que a proposta lle chegou de Alcaldía. Un barco saíndo a faenar, nun mar embravecido. Tirando dese fío, buscou inspiración en imaxes e tamén en navíos malpicáns. Coñeceu así mesmo ao histórico mariñeiro Castelao, precisamente un dos residentes no edificio, e na súa embarcación fixouse para dar vida á obra. A que pinta este creador do Temple (Cambre) levará por nome Malpica, pois a idea non é pintar un barco concreto senón que a través del representar ao conxunto, un barco «universal»: «O mesmo fago coas señoras [di en alusión ás avoas]. Non pinto a unha porque en si mesma sexa máis especial que as demais, senón que a través dela represento a un colectivo de mulleres».
O barco Malpica lánzase a conquistar o mar, rompendo as ondas. Non pode estar Yoseba máis contento con que as Administracións sigan apostando por estas propostas: «Traballo de isto», ri. Di que a fachada malpicá, que acusaba moito o efecto da salitre, «cambiou bastante».
Non lle é nova ao artista a Costa da Morte. Ten murais en Carballo (Fina, executada para o festival Rexenera Fest), no Couto ou tamén en Baio (nada menos que tres). En breve irase a Ribadeo e, despois, a Curtis ou Padrón. Máis adiante, a Langreo (Asturias) e a Elxe. Non ten proxectos inminentes en Bergantiños, Soneira e Fisterra, pero si uno pechado xa para o ano que vén por estas lareiras: será, segundo avanza, na lonxa de Laxe .
As iniciativas en torno á arte urbana non descansan no verán. É un exemplo Carballo, que presentou fai uns días a edición estival de Derrubando muros con pintura: do 12 ao 22 de agosto, catro artistas locais, Isa, Nere, Nazaret e Tucho, intervirán noutros tantos espazos: rúa Xasmíns, traseira da ludoteca municipal, rúa Igrexa e traseira do auditorio do IES Alfredo Brañas. A proposta levará aparellada, ademais, obradoiros, faladoiros e encontros ao redor da música.
