Walter Pardo anuncia unha nova «reforma» na Casa dá Auga «para facela rendible»

A ansiada reapertura da piscina de Malpica, pechada baixo sete chaves desde verán do 2011, foi un dos compromisos do alcalde, o socialista Walter Pardo Añón. E onte, no Cita co Concello de Radio Voz Bergantiños, volveuno deixar claro. «Segue pechada por desgraza, se por min fose xa estaba aberta», apuntou. En todo caso anunciou a aprobación dun «orzamento para facer unha reforma na piscina e facela máis rendible e viable». Non fixou prazos para a súa posta en marcha, pero si que dixo que o seu obxectivo é poder abrila antes de que conclúa este mandato. Pero ademais da Casa dá Auga, o rexedor abordou outros temas de actualidade municipal:

Centro de día. Walter Pardo dixo que permanece á espera de que Política Social lle reenvíe a documentación dun novo convenio (que substitúa ao anterior, xa caducado) para regular a construción e mantemento da futura infraestrutura.

Garda Civil. Dixo que o posto do instituto armado non periga baixo ningún concepto. O mandatario indicou que se van acometer as obras comprometidas no seu día nos baixos do consistorio, que xa obtiveron no seu día o visto e prace dos responsables da Comandancia.

Obras no centro urbano. Lamentou que o proxecto aprobado no seu día polo PP e a Xunta adoecese de cuestións tan relevantes como «o soterramento do canleado» ou que no último tramo, previo á estación depuradora, «as canalizacións de pluviais se xunten coas fecais». Walter tamén botou en falta un proxecto «para o apuntalamento da dársena» e facilitar o tránsito de vehículos pesados. En todo caso, como o verán está como quen di ao virar a esquina, a prioridade agora é rematar o xa proxectado para, nun futuro, volver desenvolver un plan de actuación máis ambicioso.

Novos aparcadoiros. O alcalde indicou na súa intervención que hai un propietario dun terreo que tería dito que si á proposta do Concello e permanece á espera da resposta doutros dous. En todo caso, dixo que o executivo local xa solicitou a Portos de Galicia a cesión do tramo existente entre a fábrica de xeo e a lonxa para que se poida aparcar durante as fins de semana. De forma paralela, anunciou a retirada «de todos os bolardos e a posta en marcha dun plan de viabilidade de tráfico en todo o casco urbano».

Obras en paseo marítimo. A prioridade é a creación dun muro de contención na zona do Caldeirón, a habilitación dunha «contraola» e a construción dunha rampla para persoas con diversidade funcional.

---

---

---