Converteuse nun punto negro do interior de Galicia
08 ene 2020 . Actualizado ás 05:00 h.«Hai poucos accidentes, pero os que hai, son tremendos». Así definía onte un veciño da Silva (Cerceda) o tramo da AC-413 que o domingo foi escenario doutro tráxico sinistro, con dous mozos mortos, un veciño da Silva, de 21 anos, e outro de Ordes, de 26, así como un matrimonio, un home de 53 anos e a súa muller de 51, feridos.
A AC-413 é unha estrada de titularidade autonómica moi transitada. Enlaza Cerceda, Ordes, Carballo, A Silva, Tordoia... «A xente deica que vai para o aeroporto de Lavacolla adoita coller esta estrada cara a Ordes e de aí a Santiago», explica. Tamén é un viario utilizado para os que desexan coller a A-6, dirección Madrid: «Saímos de Cerceda, collemos cara a Ordes e, de alí, enlazamos con Curtis, Teixeiro e Guitiriz antes de coller a autovía», indicou un usuario da AC-413: «Veño sempre por esta estrada, como mínimo, dúas ou tres veces á semana», argumenta.
«É unha recta de dous quilómetros e invítache a pisar»
A denominada recta da Tablilla ten uns dous quilómetros de lonxitude. Arrinca na curva da Ferralla e remata en Xesteda, tras pasar pola Tablilla. O tramo poboado está limitado a 50, aínda que hai outros a 70 e 90: «O problema é o exceso de velocidade e confianza. A maior parte dos que a utilizan son xente de aquí, e claro, é unha recta de dous quilómetros e invítache a pisar», explica outro veciño da Silva, quen lembra as visitas do radar de Tráfico por esta recta.
A AC-413 foi arranxada fai xa uns anos, segundo confirmaba onte o alcalde de Cerceda, José García Liñares: «Fíxose unha obra en dúas fases: A Silva-Ordes e A Silva-Carballo, e lembro que na recta da Tablilla eliminouse un cambio de rasante que era moi perigoso», dixo.
O accidente do domingo fixo lembrar a moitos veciños o sinistro ocorrido na madrugada do 21 de decembro do 2014. Un mozo de 26 anos perdeu a vida a escasos catro quilómetros da súa casa. O seu coche chocou por detrás cun camión cisterna, que circulaba no mesmo sentido; o turismo saíu desprazado varios metros e o condutor, despedido. O vehículo, que quedou esnaquizado, impactou contra un autobús aparcado no lugar.
Ambos os sinistros gardan algunhas similitudes: foi un domingo, eran mozos da mesma parroquia (Rodís), todo apunta a unha velocidade inadecuada e unha persistente néboa: «Aquí a néboa cando baixa, carga máis que noutros sitios, apenas che deixa ver», lembrou un residente na Silva.
Nesta recta producíronse outros accidentes graves nos últimos anos, como o da mañá do 26 de xaneiro do 2013. Dous vehículos chocaron frontalmente en plena recta.