A Fiscalía mantén a petición de ano e medio de prisión e 17 de inhabilitación para Liñares
CERCEDA
O xuízo contra o alcalde de Cerceda e o arquitecto municipal quedou visto para sentenza
20 jul 2019 . Actualizado ás 05:00 h.A Fiscalía mantén para o alcalde de Cerceda, José García Liñares, a petición de pena dun ano e medio de prisión e 17 de inhabilitación por prevaricación e fraude á administración. E reclama un ano e medio de cárcere e 13 de inhabilitación por estes mesmos feitos para o arquitecto municipal, Antonio José Varela Mallo.
Así o confirmou o avogado da Ulises Bértolo, de Bermor Avogados. «O Ministerio Público mantén para os meus clientes as penas solicitadas durante a celebración do primeiro xuízo», cuxa resolución foi anulada pola Audiencia Provincial en abril.
O fiscal entende que na contratación da obra da lagoa do xardín botánico e a habilitación dunha segunda drenaxe non se seguiron as canles legais. Unha versión coa que non está de acordo Ulises Bértolo.
«Solicitamos a libre absolución. Para a defensa quedou acreditado que, por parte do alcalde e do arquitecto municipal, non se cometeu ningún tipo de irregularidade penal en relación aos procedementos de contratación da obra da lagoa e da segunda drenaxe». E engadiu: «De haber un erro, sería de índole administrativo e labor polo secretario municipal, quen, a pesar de recoñecer o seu erro, non o notificou ao alcalde, nin de forma oral nin escrita. Cando o alcalde tivo constancia de que houbo ese erro no procedemento, repito administrativo, xa era tarde, a obra fora executada e aínda así enviou o expediente ao Consello Consultivo para dar conta do ocorrido. O resto de posibles irregularidades xa foron emendadas polo alcalde».
Coa declaración onte de tres técnicos e do portavoz do PP, José Francisco Santos Regueiro, quedou visto para sentenza este proceso aberto contra o mandatario e o arquitecto municipal.
O secretario haberíalle recoñecido ao portavoz do PP o seu erro no procedemento
Na segunda xornada declarou, entre outros, o portavoz do PP, José Francisco Santos, quen no seu día puxo o tema en mans da Fiscalía. E declarou que o secretario municipal, Raúl Martínez, recoñeceulle que se equivocou no procedemento de contratación da obra da lagoa. Para Santos esta circunstancia é irrelevante: «O importante é que as obras comezaron tres semanas antes de que concluíra o procedemento de contratación e licitación».