Segunda Divisón B | Os branquivermellos están últimos a catro puntos da salvación
15 ene 2018 . Actualizado ás 13:16 h.Nin sequera a situación do Guijuelo, que chegou moi minguado polas saídas de Pino e Cifo, á que se sumará Sergio Rivera, e que tiña ademais as baixas de Jonathan e Ayala deulle opción algunha ao Cerceda, que recibiu unha contundente goleada en casa (0-4), co que acumula xa 14 xornadas consecutivas sen coñecer a vitoria. Aínda por riba de males, todos os seus rivais directos sumaron, o Valladolid B, cunha vitoria ante o Raio Majadahonda, a Ximnástica, cun empate ante o Celta B, e o Racing de Ferrol cun triunfo pola mínima en casa fronte á Ponferradina, que deixa aos de Tito Ramallo afundidos no fondo da clasificación, con só 16 puntos, a catro da cada vez máis complicada permanencia que marcan agora o Pontevedra e o propio Racing.
Sen necesidade dun brillo excesivo, os salmantinos fixéronse donos do partido desde os primeiros compases do encontro, cunha forte presión no centro do campo, que desarmou enseguida calquera opción dos locais para tomar o mando e soñar coa posibilidade de sacar algo positivo nunha nova tarde xélida no Roxo. Unicamente antes do descanso tiveron os branquivermellos unha ocasión verdadeiramente clara para anotar, por medio dun centro chute de Juanmi que despexou o porteiro Kike Royo ao poste.
Era a oportunidade dos de Ramallo para nivelar o primeiro gol do partido anotado por Manu Fuster no 28 dun bo disparo e saír con outros ánimos á volta de vestiarios. Con todo, o que ocorreu foi todo o contrario, porque os visitantes regresaron da caseta aínda máis enchufados e enseguida empezaron a encadear ocasións para certificar a vitoria. Diego Suárez converteuse na referencia dos seus, cun gol e dúas asistencias que decantaron definitivamente a balanza para o conxunto chacinero, que no minuto 57, co cuarto tanto de Raúl Ruiz, enterrou calquera opción de resposta local. Mesmo seguiu apertando e puido por medio de Carmona chegar a lograr un quinto gol ante un Cerceda claramente derrotado.
Tito Ramallo: «Este partido déixanos moi tristes e tocados. Tíñamos moitas esperanzas»
A pesar de que no primeiro período estivo a cousa bastante igualada, cos cercedenses moi metidos no partido aínda que cos rivais dominando, a segunda parte desequilibrounos totalmente. A directiva do club cualificou onte este choque como o peor da tempada, sendo os salmantinos moi superiores e, polo tanto, xustos vencedores. Segundo o adestrador, Tito Ramallo, «ous rivais souberon aproveitar as ocasións, mentres que nós, a única que tivemos, tirámola ao pau», explicou. Ao que engadiu: «Co primeiro gol aínda non nos viñemos abaixo, pero o segundo causounos moito dano anímico. Os xogadores estiveron apagados durante uns momentos e eles aproveitaron, sendo moi superiores na segunda parte».
Coa de onte, xa son quince xornadas nas que o Cerceda non coñece a vitoria, pero esta última causou especialmente un afundimento no equipo: «Tíñamos moitas esperanzas postas neste partido para que fora un punto e a parte. Déixanos moi tristes e tocados», comentou Tito. Cabe lembrar que o pasado mércores falaba de que a partir de agora o Cerceda tiña que puntuar si ou si, pero os seus desexos parecen estar lonxe de cumprirse.