O docente Fernando Castro Paredes gaña o II Certame de Nova Dramaturxia Galega Actual
CEE
Impúxose á vintena de obras presentadas con «Ofelia ou o cabeiro da cóbrega»
27 ene 2020 . Actualizado ás 21:54 h.O escritor e docente Fernando Castro Paredes, profesor no IES Fernando Blanco de Cee, vén de gañar o segundo Certame de Nova Dramaturxia Galega Actual coa súa obra Ofelia ou o cabeiro da cóbrega.
O xurado do concurso, convocado pola compañía teatral Feira do Leste, destacou «o coidado uso da lingua galega e o artellamento dunha sólida carpintaría dramatúrxica neste novo achegamento ao mito de Hamlet dende a personaxe de Ofelia», así como «a recuperación da maxia para o teatro cunha riqueza de accións dramáticas que poden resultar moi estimulantes á hora de poñelas sobre as táboas, tanto para un equipo artístico como para o público».
Os encargados de valorar as 21 horas que se presentaron a esta segunda edición foron a directora teatral e programadora da sala Ingrávida (O Porriño), Irene Moreira; a dramaturga e directora da Erregueté, Vanesa Sotelo; e o director teatral César No.
Este certame procura dar maior visibilidade aos novos dramaturgos galegos a través da edición e publicación da obra nun volume con textos doutros autores galegos que están a destacar actualmente polo emprego de novas linguaxes e temáticas. «Estamos moi contentos porque vemos que existe un interese por dar a coñecer a obra de novos autores, e iso reflíctese na alta participación con respecto á edición anterior: de 14 a 21 obras presentadas», sinalan desde a compañía que convoca o certame, e engaden: «A eiva non está só na falta de representación escénica das obras dos autores, senón tamén na publicación e difusión das súas creacións. Nós queremos axudar a cambiar esta situación».
Ofelia ou o cabeiro da cóbrega, a obra coa que Castro se impuxo no certame, centra a súa acción no pazo de Elsinor, no corazón da antiga Dinamarca. Polonio, un conselleiro do novo monarca, vén de ser asasinado de xeito brutal e a súa filla, Ofelia, sentirá no seu interior o impulso da vinganza.
Aínda que nado en Asturias, Fernando Castro é docente no instituto Fernando Blanco de Cee. Traballa no eido do teatro escolar e afeccionado e vén de gañar, así mesmo, o Premio Rafael Dieste da Deputación con Amorodo agre.