Afafes quere sumar o apoio da Xunta ao proxecto de centro de día para habilitar no seu local de Cee
CEE
Doutra banda, o Calvo Basket Xiria agradecerá no seu partido de hoxe o traballo que fai APEM, aproveitando que esta semana se celebrou o día mundial da saúde mental
12 oct 2019 . Actualizado ás 05:00 h.A Asociación de Familiares de Enfermos de Alzheimer e outras demencias de Fisterra e Soneira (Afafes) segue adiante na súa posta en marcha, desde que en maio a entidade empezou a atender aos enfermos no seu local, situado na antiga escola municipal do Campo do Sacramento. O seu obxectivo é ter un centro de día completo, para o que xa teñen o apoio da Deputación. E agora queren sumar o da Xunta. Foi o que lle solicitou onte o presidente, César Bugallo, ao director xeral do Maior, Ildefonso de Cámpaa, durante a súa primeira visita institucional ao centro ceense.
De Cámpaa interesouse polo funcionamento da entidade, os seus obxectivos, percorreu as instalacións, e tamén explicou os requisitos que hai que cumprir para acceder a axudas. «A idea que ten é a de axudarnos», indicou Bugallo, satisfeito coa visita do alto cargo da Xunta.
Afafes ten agora uns dez usuarios diario de media, pero chegarán máis nas próximas semanas. A atención é só polas tardes. Un centro de día permitiría dar un salto de calidade asistencial moi elevado.
APEM saíu á rúa para chamar a atención sobre os silencios en torno ao suicidio
A Asociación Pro Enfermos Mentais (APEM) de Cee participou o xoves nos actos conmemorativos do Día Mundial da Saúde Mental. Así, membros deste colectivo na localidade concentráronse na praza 28 de Marzo da localidade para responder á chamada deste ano a prestar atención a unha realidade da que non se adoita falar, o suicidio.
«Conecta coa vida»
A protesta levou a cabo baixo o lema Conecta coa vida, que ten por obxecto conseguir que as institucións públicas fagan un esforzo na prevención deste mal, que é un dos máis mortes ocasiona, máis que moitas das enfermidades ás que se lles destina grandes recursos.
Sosteñen os promotores da campaña que en España se vai con atraso en canto á prevención do suicidio con respecto a outros países europeos, sobre todo os nórdicos. Estes lograron reducir drasticamente o número de mortes por esta causa grazas aos tratamentos e protocolos postos en marcha.
Baloncesto con tinguidura social en Carballo
O Calvo Basket Xiria xoga hoxe en Carballo e recibe ao Obradoiro Silleda (liga EBA) ás 17.30 no polideportivo Vila de Noia. Será un duelo interesante no deportivo (os pontevedreses foron campións de primeira autonómica a tempada pasada), pero haberá máis alicientes para asistir, con entrada gratuíta e actividades durante o descanso e ao final do partido. Precisamente na metade, o club agradecerá o traballo que realiza a entidade APEM, aproveitando que este xoves se celebrou o día mundial da saúde mental.
As diversas asociacións de saúde mental usaron o lema Conecta coa vida para chamar a atención sobre o suicidio, «un problema sanitario e social de gran relevancia en Galicia», apuntan desde o club. Un representante de Apem lerá un manifesto respecto diso deste grave problema.
En próximos partidos haberá actividades de colaboración con outras entidades sociais.
O Xiria xogará de amarelo, lembrando a indumentaria dos anos 80, con foto conmemorativa dos participantes.