Ao condenado, nacido en Santiago, fixáronlle ademais unha multa de 142,849,12 euros
14 feb 2019 . Actualizado ás 05:00 h.Catro anos e medio de prisión e unha multa de 142.849,12 euros. Esa foi a pena imposta pola Audiencia Provincial contra un individuo, nacido en 1965 en Santiago e residente en Cee. Atribúeselle un delito contra a saúde pública na modalidade de tráfico de drogas «das que causan grave dano á saúde».
O procesado, que levaba en prisión provisional desde maio do pasado ano, viña dedicando desde agosto do 2017 á comercialización de estupefacientes. Segundo indica a sentenza, o condenado, sobre o que tamén pesan senllas sentenzas do 2008 e 2015 por delitos contra a seguridade viaria, comercializaba con sustancias estupefacientes, utilizando para iso o seu domicilio, situado en Cee, onde recibía aos consumidores. Noutras ocasións baixaba e atendía a súa clientela no portal.
A Garda Civil decidiu montar varios dispositivos de vixilancia nas inmediacións da casa. Os axentes encargados do caso comprobaron como coñecidos consumidores accedían ao inmoble, permanecían uns minutos e marchábanse. Outras veces o acusado saía da súa casa a bordo de diferentes vehículos, transitaba polas rúas de Cee realizando innumerables paradas, durante as cales ía recollendo a persoas que o agardaban na beirarrúa, circulando con eles durante uns minutos ata deixar aos compradores de droga de novo na lugar de recollida.
En novembro do 2017 trasladouse a un apartamento de Sardiñeiro, onde continuou, segundo a Audiencia Provincial, con esta actividade ilícita, que se estendeu a Fisterra, Cee e O Ézaro. Foi arrestado pola Garda Civil e fóronlle requisadas sustancias por importe de 71.424,56 euros.