Xa na rúa o primeiro disco de Antía Muíño: este 25N preséntao en Carballo
CARBALLO MUNICIPIO
Con raíces en Cee e Baio, lanzou este 24 de novembro «Carta Aberta». A cantautora actúa este venres «na casa»: 21.00 horas, biblioteca Rego dá Balsa
25 novs 2022 . Actualizado ás 09:22 h.«Estou ilusionada, contenta. Por fin saíu xa e encantada». O 24 de novembro do 2022 quedará gravado no calendario da cantautora Antía Muíño, con orixes en Cee e Baio. Saíu a cálea «Carta Aberta», o seu primeiro disco. Suma felicidade ao ter sido premiada como Artista Emerxente nos últimos MartínCodax . Foron estes últimos días de «nerviosismo», recoñece, pero velaí xa o «alivio» de que todo o traballo destes meses, «e de todo ou ano case» estea xa nas súas mans e no daqueles que queiran facerse con el (plataformas, cedé, vinilo...). «Faime moita ilusión compartir con todo o mundo a miña música», declara.
Este venres 25 de novembro ofrecerá un concerto en Carballo (21.00 horas, biblioteca Rego dá Balsa, entradas a 3 euros, á venda xa desde hai días nas librerías). Promove a asociación Lumieira, precisamente conmemorando o 25N, e ela asegura estar «contentísima» de tocar «na casa, coma quen di, e de facelo nunha data tan sinalada». «É unha honra que contasen comigo. Vai ser o primeiro sitio, de feito, no que presentaremos o disco. Agradecida e con ganas de chegar a Carballo».
De «Carta Aberta», disco «con certo aroma a álbum de culto», como se puido ler xa, non se poden perder temas como ese mesmo, Carta Aberta, xerme de todo, ou Canta, miña compañeira, con tanto sinal comarcal. «O disco parte de varios puntos: da canción de autor, do jazz vocal, do easy listening popular na década dos ‘90 e da música tradicional galega que a artista mamou desde o berce. Esas arestas son as que conviven nun repertorio no que resoan ecos que nos levan a pensar en Norah Jones, Sílvia Pérez Cruz, Fiona Apple, Luz Casal, Corinne Bailey Rae, Tracy Chapman ou Diana Krall, pero que, sobre todo, soan a Antía Muíño», traslada o selo do traballo, Raso Estudo.
Once cancións, diferentes «climas», pezas en castelán como Novembro, ou en francés, como na súa versión de Une jeune fillette, pero absoluta marabilla en galego, tanto en pezas de composición propia como na súa adaptación, tal cal médium, de coplas tradicionais. «Un disco chamado a alumar unha canción de autor ibérica que non recaia nos clixés do xénero e que abra un horizonte novo á música que se fai desde o corazón», avanzan.