A parroquia carballesa suma aínda máis arte urbano á localidade
CARBALLO MUNICIPIO
O artista Ito Mosquera rematará hoxe na Milagrosa un gran mural de temática relixiosa
26 ago 2021 . Actualizado ás 22:57 h.Hoxe mesmo, se o tempo o permite, Ito Mosquera concluirá o gran mural de arte urbana que está a pintar nun inmoble próximo á capela da Milagrosa, en Carballo. É un encargo da parroquia San Xoán Bautista, e este creador natural de Pontedeume , pero agora residente en Málaga , está contento co resultado. «Gustábame a idea», di. Fixo dous ou tres bosquexos e na obra final pódese ver á imaxe da Milagrosa nun ceo con nubes que se integra moi ben co de verdade, «se está azul, claro», chancea Mosquera. É unha parede duns 20 metros de altura na que, ao estar revestida de paneis de PVC e non ser unha fachada de cemento ao uso, tivo que intervir previamente: «Foi máis complicado que nunha parede normal, pero gústame moito como está a quedar», di este creador que se dedica á pintura artística profesional, xa sexa neste formato ou noutros, incluído retratos. Pode saberse máis del, aquí.
Abunda a arte urbana, e Carballo sábeo ben, pero Ito cre que non tanto así aqueles que se dediquen a pintar motivos relixiosos. Para el non é a primeira vez, como non o é tampouco para a parroquia de Carballo, que xa loce fóra da igrexa San Xoán exemplos diso. Tan só lamenta Mosquera o tempo que lle tocou, porque con orvallo fino xa non pode traballar: «Levo aquí tres semanas e a primeira non puiden facer case nada».
Atopouse moi a gusto na localidade e asegura que, se pode acudir á inauguración, prevista para setembro, polas festas da Milagrosa, farao. O mural, que levará a mensaxe «A nosa Milagrosa bendí as nosas familias», é unha das iniciativas polo II Ano Parroquial.
No atrio da igrexa parroquial hai, doutro lado, un novo reloxo e unha nova imaxe de San Xoán, xa bendicidos, do mesmo xeito que unha custodia, polo arcebispo Barrio, este pasado domingo.
