Un total de 1.150 corredores tomaron a saída dunha proba espectacular
17 jun 2019 . Actualizado ás 05:00 h.O marroquí «de Carballo», como di el, Aziz Fatihi, impuxo un ritmo endiañado desde a primeira baixada, o que obrigou a Amador Pena, Cristian Muíño e a Juan Álvarez Cures a ir por el ata o punto de que fixeron o primeiro quilómetro por baixo dos tres minutos e completaron a volta inicial da carreira 10 K Concello de Carballo en tempo de marca. Tal velocidade acabárona pagando todos. O principal Fatihi, que tivo que parar, e os outros tres competidores destacados, porque acusaron ese ritmo infernal do principio.
Con ese escenario, Pena, que recoñece que ía pola marca pero tampouco tivo as mellores sensacións, foise alternando con Muíño á fronte e, aos cinco quilómetros, acadounos Cures, co que formarían o trío de cabeza ata uns 600-700 metros do final, onde o campión do ano pasado impuxo a súa lei e acaboulle metendo cinco segundos a Cures. «A verdade é que a Juan notábaselle que corría na casa e que viña con moitas ganas, porque foi a vez que máis me custou gañarlle», sinalaba Pena despois de subirse, de novo, ao primeiro caixón do podio.
Na proba feminina tampouco houbo sorpresas e Tina Fernández impúxose con bastante claridade sobre Eva Iglesias , mentres que a mazarica Rocío Alvite só puido ser terceira e a barbancesa afincada en Vimianzo Teresa Castro quedou ás portas do podio.
Á marxe da carreira absoluta masculina, na que parecía que Fatihi ía a pulverizar a marca, pero cara ao quilómetro catro empezou a queixarse e non tivo máis remedio que parar, deixándoo todo en mans do trío Pena, Muíño, Cures, o conxunto da proba foi un verdadeiro espectáculo e un éxito absoluto de organización.
Aínda coa cantidade de actos programados en localidades próximas e o día practicamente estival, acudiron 1.150 dos 1.426 corredores inscritos. Só nas categorías inferiores participaron 280 competidores. Os máis aclamados como sempre, que ademais corrían na rúa Colón, repleta de familiares e público foron os pitufos e biberóns, con idades comprendidas entre os dous e os oito anos. Xuntáronse nada menos que 331, co que encheron o circuíto de cor e animación.
Salvo unha pequena retención na rúa Barcelona, o tráfico, como explicou o técnico de Deportes de Carballo, Manuel Varela Bardanca, apenas notou a carreira. O impecable labor da Policía Local e «dous voluntarios, que sen eles facer unha proba así sería imposible», permitiu que as 11.45 horas, cinco minutos antes do previsto, todas as rúas estivesen de novo abertas.
Colaboradores
Policía Local, Agrupación de Voluntarios de Protección Civil, Asociación Deportiva Xiria, Un paso máis, Asociación Deportiva Media Ducia, Atletismo Carballo, Club Ciclista Carballo, Club Ciclista Monte Neme, Escolas de Balonmán Xiria, Escola Lubiáns, Iudo Club Bergantiños, Karate Do Carballo, Sociedade Deportiva Sofán e Club Xadrez O Toque Xiria.