Francisco Carballo foi homenaxeado polos seus vinte e cinco anos no banco do Cruceiro
16 jun 2019 . Actualizado ás 09:00 h.A figura do escocés Álex Ferguson converteuse en paradigma de lonxevidade no banco de Old Trafford, ese teatro dos soños que talvez se parece en pouco ao Cruceiro, o campo de terra no que xoga os seus partidos o Club Deportivo Palmés.
E é que o fútbol é universal. Sir Álex, como o alcumaron en Manchester, chegou aos 27 anos como adestrador dos diaños vermellos e, en Ourense, Francisco Carballo acumula xa 25 como adestrador dun modesto no que vive alegrías, sen sabores e, sobre todo, unha paixón, a balompédica.
«Son de aquí preto, de Vilamarín e só fun adestrador neste club, o primeiro ano xogando tamén e os seguintes xa unicamente no banco», matizaba o propio Francisco, antes de explicar que «Paco é o meu pai», para definir o seu apelativo, aínda que en Palmés son moitos os que se dirixen a el como Carballo.
A directiva de Emilio Fernández pensou que pechar cada tempada cunha homenaxe a alguén implicado no fútbol da localidade era unha idea adecuada e, para a primeira elección, non tiveron dúbida de que o seu fiel adestrador era a persoa idónea, un xesto que o técnico agradeceu: «Paréceme unha xornada moi bonita para todos. Reencontrarémonos con exjugadores que causaron aquí unha grata impresión e tampouco faltan os nosos veciños do Arrabaldo, que sempre responden cando necesitamos algo. No equipo deste ano non nos saíron as cousas tan ben, pero son bos rapaces e é un pracer estar con eles».
No recordo de Carballo están os seus dous ascensos á Segunda Galicia en posición preferente, pero en cada ano acumulou experiencias positivas, que o enriqueceron en todas as facetas da súa vida: «A estes clubs vés traballar, pero falo porque che gusta». E é evidente que o adestrador é algo máis no Palmés, onde mesmo é directivo.