O primeiro logrou moi bos resultados e o goberno local aspira a repetilos, se a Consellería de Educación concédeo
20 jun 2018 . Actualizado ás 05:00 h.O Concello de Carballo aspira a conseguir un segundo obradoiro de emprego de garantía xuvenil, tras os bos resultados co primeiro, realizado este ano, no que tres dos doce alumnos formados na especialidade de carpintería xa conseguiron a inserción laboral no sector, e non se descartan máis contratacións. Destaca o goberno local que para todo o alumnado foi o seu primeiro contacto coa carpintería, por iso é polo que o éxito sexa maior.
En todo caso, é á Consellería de Educación á que corresponde concedelo.
Desde o Concello sinalan que a Consellería de Promoción Económica aposta de novo pola carpintería. Neste caso, a parte práctica permitirá completar o proxecto de reurbanización da contorna do Fórum -unha actuación que custa 464.000 euros a cargo dunha parte do superávit- coa construción do mobiliario urbano. O proxecto que se presentou ante a Xunta inclúe a construción de bancos, pérgolas e xardineiras, entre outro mobiliario, para as rúas Xílgaro e Luís Braille, cun orzamento de 137.000 euros.
Ademais do obradoiro de emprego, este curso impartíronse en Carballo catro cursos de plan AFD, dirixido a persoas desempregadas, e subvencionados polo Fondo Social Europeo a través da Xunta. O índice de éxito acadou o 50 %, xa que completaron a formación 29 dos 58 alumnos. Algúns deles non remataron aínda todos os contidos, como os nove de bar e cafetería.