Entre as entidades incluídas na listaxe figuran 30 da Costa da Morte, que se repartirán 94.410,20 euros
18 oct 2018 . Actualizado ás 05:00 h.A Deputación da Coruña destina este ano case un millón de euros aos programas de actividades desenvolvidos polas asociacións culturais. Son 251 as entidades beneficiarias dunha liña de axudas que ten como obxectivo fortalecer o tecido cultural de base.
Entre as entidades incluídas na listaxe figuran 30 da Costa da Morte, pertencentes aos concellos de Camariñas, Dumbría, Cee, Cerceda, Ponteceso, Muxía, Vimianzo, Zas e A Laracha. Entre todas elas se repartirán 94.410,20 euros.
A área de Cultura, que dirixe a tamén vicepresidenta da entidade provincial, Goretti Sanmartín Rei, financiará a escolas de música, actividades formativas, semanas culturais, obradoiros, certames artísticos, accións divulgativas do patrimonio, elaboración de documentais, programas experimentais, procesos de dixitalización de arquivos e documentos, edición de publicacións divulgativas e organización de eventos especiais.
«Para nós é fundamental contribuír á dinamización do tecido cultural e á cantidade de actividade que desenvolven as asociacións. Entendemos, como di o noso lema, que a cultura é un dereito e iso non se refire unicamente á participación en eventos culturais, senón tamén á posibilidade de producir cultura, de crear novas iniciativas e materializalas como se fai na maior parte de asociacións culturais que traballan nos concellos», apuntou Goretti Sanmartín, quen indicou que esta liña de axudas impúlsase baixo os criterios de concorrencia competitiva.
Valor engadido
Segundo a vicepresidenta da Deputación, «con estas liñas de axudas quérese afortalar o labor, de gran valor, que levan a cabo as asociacións, e contribuír a que o fagan nas mellores condicións posíbeis. Por iso queremos apoiar as actividades, máis tamén fornecer de investimentos necesarios para o seu traballo».