A profesora do IES Lauro Olmo Tania Suárez acaba de publicar o libro «Pituca na procura da súa identidade»
20 oct 2021 . Actualizado ás 05:00 h.Tania Suárez é natural do municipio de Cabana de Bergantiños e é profesora de Bioloxía no IES Lauro Olmo do Barco desde fai catro anos. O mesmo tempo que leva vivindo na capital valdeorresa. Alí ensina cada día o que sabe aos seus alumnos de ESO e Bacharelato, pero sempre sentiu que tiña unha conta pendente cos máis pequenos. Todo xurdiu por mor dunha conversación cos seus sobriños. «Comezamos a falar do reino animal, concretamente dos vertebrados. Vin que lles fascinaba o tema pero que non tiñan claras moitas cousas», lembra. Así naceu a idea para un conto infantil. Falando cunha amiga ilustradora, a malagueña Irene Mira, decidiron unir as súas especialidades e sacar adiante o proxecto. O resultado é o libro Pituca na procura da súa identidade, que acaba de publicar a editorial andaluza Altramuz. Unha historia protagonizada por animais e dirixida a pequenos de entre 3 e 6 anos, na que se fala da importancia do amor propio. «Ten algúns valores encubertos como o imprescindible que é quererse a un mesmo. Pouco a pouco vaise descubrindo na historia», explica Tania. O conto pode comprarse tanto en librerías como na web da editorial e ten un prezo de 14,95 euros. As súas autoras presentarano na Central Libreira de Ferrol en novembro e despois viaxarán con el ata Málaga, aínda que poida que antes o presenten tamén no Barco, onde se escribiu e desenvolveuse a idea. «Estamos moi ilusionadas porque levabamos máis de tres anos con este proxecto», di Tania e admite que lle gustaría repetir experiencia como escritora. Agora só queda lelo.