Educación trasladoullo á dirección do centro, informa a ANPA A Balea, que celebra a noticia
04 ago 2021 . Actualizado ás 16:16 h.Boas noticias para Caión (A Laracha) e para a comunidade educativa do seu centro escolar, que nos últimos días mobilizouse porque, de cara ao próximo curso, perderían unha unidade de primaria, pasando de tres a dous, e iso por un só neno. Educación informou ao director do centro, José Roca, de que esa terceira unidade se manterá, polo que a situación queda como estaba. Así llo trasladou Roca aos pais e á ANPA A Balea, indicou o presidente desta última, Paco Rey . «Estamos moi contentos», di, porque este anuncio lles custou «un par de anos de vida». Alégranse de que se manteñan as tres unidades, «pero tamén contentos a medias», porque nestas xornadas de mobilización puideron coñecer máis casos de recortes de unidades no rural, e iso tenos «tristes».
Cando se lles comunicou o recorte, nos últimos días de xullo, desde o CEIP de Caión e a ANPA contactouse con todos os grupos con representación na corporación (PP, PSOE e BNG) para que apoiasen a súa loita pola conservación desta terceira unidade, un asunto que ía chegar tamén ao Parlamento con senllas iniciativas do PSOE e BNG. O pasado venres, ademais, o pleno, de forma unánime, referendou unha declaración institucional en apoio ás reivindicacións da comunidade escolar. Desde a ANPA A Balea agradeceron este martes a todos cantos fixeron «barullo» para dar a coñecer a súa loita: «Gañamos!». De non ser así, a cociente das dúas unidades sería de 17 e 19 alumnos, de ata tres niveles e con métodos curriculares moi diferentes.
O colexio de Caión facía público tamén nas súas redes este desenlace: «Queridas familias e simpatizantes do Ceip de Caión Temos boas novas respecto ás reclamacións que puxemos en marcha a semana pasada. Tras varios días de insistencia e contacto coa administración educativa, recibimos unha chamada dá inspección informándonos de que se nos adxudicaba a praza de Primaria que nun principio non aparecía. Acaba de saír a adxudicación definitiva do CADP e podemos confirmar oficialmente que teremos a 3ª unidade de Educación Primaria como viñamos gozando nos últimos anos. Grazas á ANPA, ao Concello e ás familias que puidestes asistir ou outro día á mobilización. Parece que tivo vos seus froitos. Agora se que boas e tranquilas vacacións a todas e todos. Vémonos en setembro!».