Os 20 alumnos do obradoiro iniciaron onte o programa
19 novs 2019 . Actualizado ás 05:00 h.Un total de 20 alumnos, 10 no módulo de carpintería de madeira e outros tantos no de pintura industrial, iniciaron onte, con presenza do alcalde, José Manuel López Varela, e da concelleira de Emprego, Rocío López, o novo obradoiro de emprego do Concello da Laracha.
Todos son veciños do municipio e teñen por diante nove meses de formación remunerada, nos que terán a posibilidade de realizar prácticas á vez que aprenden e recibirán un certificado de profesionalidade que lles acredita para desempeñar o seu oficio. Todo iso mentres realizan actuacións de interese comunitario nas infraestruturas públicas do concello. As principais para os carpinteiros son a renovación do paseo fluvial do Anllóns, entre Gabenlle e a ponte do Formigueiro e a mellora da carpintería interior e exterior da piscina municipal.
Os alumnos do módulo de pintura actuarán na Casa do Concello, o edificio administrativo, a Casa dá Cultura, o centro sociocultural de Paiosaco, as pistas polideportivas de Cabovilaño e Cumiáns (Montemaior) e nos báculos da iluminación pública.
O alcalde felicitoulles por haber resultado elixidos no proceso de selección, defendeu estes programas como «a mellor das iniciativas que se poden poñer en marcha desde as administracións» e destacou os bos datos de inserción logrados en obradoiros anteriores polo que chamou aos alumnos a aproveitar a oportunidade.
A Xunta achega 336.000 euros para os gastos de persoal e o Concello financia as obras que se van realizar ata unha suma total de 863.000 euros.