A participación superou as 700 persoas. A colaboración empresarial, moi alta
14 oct 2019 . Actualizado ás 05:00 h.A cea anual da xunta local contra o cancro da Laracha, destinada (como todas as demais) a recadar fondos para axudar á loita contra a enfermidade, sumou unha nova edición (xa van 15) que se pode resumir como as anteriores en abarrote. O pavillón do Agra de Leborís estaba a lume de biqueira, e máis xente habería de ter máis sitio dispoñible, algo que xa vén comentando de anos atrás. Onte, aínda co cansazo no corpo, tras unha noite longa e animada, chea de gastronomía, música e conversación, tocaba facer un primeiro balance. A presidenta da entidade, Maica Pose, faino rápido: «Foi todo moi ben, eu diría que perfecto». Esta apreciación contundente baséase, segundo explicou, nos comentarios dos participantes, cos que foi conversando mesa por mesa. «Dicíanme que cada ano, mellor, e eloxiaron especialmente ou cátering», que correspondeu á empresa Josmaga. «Estivo de dez», indicou. A colaboración empresarial, unha vez máis, foi esencial. Ás veces eses detalles que non ven. Por iso destaca, entre outros, a Viveiros Amado, que se encargou de «poñer todo coma nun restaurante, co difícil que é nun polideportivo». A Alquigal, que achegou os calefactores. A J. Esmorís e Fillos, «que montou todo, vos estantes, vos estadas». E que, por suposto, onte pola mañá, domingo, houbo que retirar, engadindo traballo á xornada de descanso. Á multitude de empresas, da Laracha e doutros municipios, que achegaron artigos para os sorteos. «E, sobre todos, aos veciños», sinala Pose, pola súa colaboración e participación. Unha especie de compensación (aínda que nin esta cea nin as demais concíbense en termos de contraprestación) son os agasallos da tómbola, ademais do sorteo coa entrada, sen rifa, no que colaboraron de xeito moi activo asociacións deportivas, culturais, clubs, comisións de festas... Unhas e outras organizaran algún acto para doar o recadado a este fin. Así que, entre unhas cousas e outras, a implicación social foi extraordinaria, o que ao final compensa o esforzo de moitos meses de traballo e sen dúbida o fin ao que vai destinado.
Outros actos
As diferentes asociacións da comarca concentran nestas semanas as súas principais actividades anuais. En Carballo celebraron a semana pasada a súa multitudinaria andaina, e en Muxía, a comida. Esta semana tócalle a Cabana, con actividades xa desde o día 16. E unha charla sobre o cancro prevista para o 17, ás 19.00, no auditorio municipal. A andaina será o sábado 19. En Coristanco, a cea benéfica será o sábado 26. E aínda quedan máis por diante.
Clubs, comisións de festas e entidades variadas tamén achegan fondos e agasallos