Axenda diaria | En Caión chegou o día para o novo Asteria, que se inaugura esta tarde
12 nov 2025 . Actualizado á 05:00 h.Hoxe • Mércores 12 de novembro e varias citas de interese para esta xornada na Costa da Morte:
Carballo • O Concello de Carballo programou varias actividades con motivo do 120. º aniversario do nacemento, nesta vila, do escritor e xornalista Cándido González Tiradas. Estaba programada para hoxe unha unha ruta, mais ten que ser adiada debido ás malas condicións meteorolóxicas. Si haberá un acto de lembranza, aberto a toda a veciñanzan, e mudado ás 12.00 horas. Na propia rúa Cándido González Tiradas será inaugurado un panel informativo cos principais datos biográficos do autor e realizarase ademais unha ofrenda floral. Estarán presentes a concelleira de Bibliotecas, Ángeles Pacoret; o historiador Hadrián García; familiares do autor, e o alcalde, Daniel Pérez.
Caión (A Laracha) • Chegou o día para o local hostaleiro Asteria. Hoxe ás 20.00 horas botará a andar a inauguración da nova etapa deste veterano establecemento, nunha ubicación e un espazo totalmente novidoso, nos baixos da cetárea. Haberá sorpresas, música e moito por compartir xuntos.
Carballo • Tamén na localidade carballesa, e máis concretamente na biblioteca Rego da Balsa, contan hoxe cunha nova visita dos Ratos de Lonxedetodo. A sesión de hoxe pasa por un espectáculo de hipnotismo da gran Lilí Gruyére xunto co seu amigo, o rato Fuco. Ás 17.30 e 18.00, entrada de balde pero con inscrición.