O local Alejo transformou un penalti sobre el mesmo no gol do empate
28 novs 2021 . Actualizado ás 22:47 h.Emocionante derbi o vivido este domingo no Cairo, tanto polo visto no céspede como nas bancadas. O encontro acabou en táboas, con 1-1 no marcador, logo dunha primeira parte na que o Baio se adiantou por mediación de Paco , e unha segunda que arrincou co gol do empate ao transformar Alejo un penalti que se produciu sobre el mesmo. O punto deixou mellor sabor de boca para os locais, recentemente ascendidos, que non tiveron o mellor inicio de liga con só dous puntos na marcadora. Pola súa banda, os baieses, asentados na categoría e que aspiran a xogar a fase de ascenso, frearon un refacho de dúas xornadas gañando e, o que aínda é peor, descolgáronse do liderado que, antes do duelo, compartían con outros tres equipos.
Os visitantes apertaron desde os primeiros compases. Pronto chegou o primeiro gol do encontro, do dianteiro do Baio, Paco, pero estaba en fóra de xogo e o colexiado anulouno. Os cormeláns agardaban replegados para saír á contra. As chegadas á área do Corme comezaron a sucederse co paso dos minutos. O central Pandi e o porteiro Suso evitaron numerosas arremetidas visitantes.
O adestrador do Baio, Pablo Torreira, dispuxo un 4-3-3 sobre o céspede, mentres que o tándem do banco local, formado por Anxo e Manuel, debuxou un 4-4-2 con Alejo como referencia en ataque.
Un tiro de Doldán desde a banda esquerda que se marchou fóra por pouco foi a única ocasión dos anfitrións nos primeiros 45 minutos. Pola súa banda, os branquiazuis, vestidos onte de branco, tiveron unha moi clara de Bieito que entre Suso e Aitor sacaron in extremis.
Os dous conxuntos puideron levar o triunfo ao final
Corría o minuto 37 cando Bieito fíxolle un pase da morte desde o costado esquerdo a Paco que, esta vez si, puido celebrar o tanto. Co 0-1 chegouse ao descanso.
Tras a continuación, os azulones metéronse de cheo no partido ao elevar o electrónico ao 1-1. Ceide quixo evitar unha incursión de Alejo na área e o trabó. O propio ariete transformou a pena máxima no gol do empate, que xa sería definitivo.
Antes de irse aos vestiarios, o Corme xa mellorara as súas prestacións. Na segunda parte deu un paso adiante, sobre todo, a raíz do tanto, que sentou como un xerro de auga fría para os visitantes. Lucas pasou do centro do campo á mediapunta e iso tamén lle deu un plus aos pontecesáns, que este domingo atoparon nas galopadas ao seu mellor aliado.
O triunfo puido caer para calquera lado nunha segunda parte que xa foi máis disputada no medio do campo. Á media hora, un centro chute de Porty non entrou entre os tres paus de milagre. No outro arco, Lucas tivo un man a man co meta Diego, que este parou. Xa nos minutos finais, unha xogada que comezou nun saque de banda do Baio rematou no traveseiro da portería defendida por Suso. Un córner do Corme sacouno de puños Diego. Os Badius animaron o encontro de principio a fin cos seus cánticos.
Ficha técnica
CORME (1): Suso (Illote, 90); Jesús, Pandi, Sueiro, Dieguito (Samu, 65), Doldán (Brais Pombo, 71), Alejo, Lucas, Toniño, Brais Torrado e Aitor.
BAIO (1): Diego; Bieito, Paco, Braian, Porty, Rubio (Hugo, 81), Ceide, Peke, Damián, Yago e Álex.
GOLES: 0-1, 37: Paco. 1-1, 59: Alejo, de penalti.
ÁRBITRO: Martín García. Amoestou a Aitor e Toniño polos locais, e a Bieito e Braian polos visitantes.
INCIDENCIAS: Partido correspondente á sexta xornada de Primeira Galicia (grupo 2 B), disputado no Cairo nunha tarde chuviosa e ante un bo número de afeccionados.