O Sofán, a por a súa primeira vitoria en Abegondo: «Competimos en cada partido»
CARBALLO
O conxunto que adestra Alberto Rodríguez recupera efectivos para medirse ao Fabril este domingo
24 oct 2021 . Actualizado ás 05:00 h.Corría o minuto 87 de partido cando o Sofán, en busca do empate ante o Ourense CF na pasada xornada de Terceira, topouse con outros dous tantos visitantes que botaron por terra os seus intentos de igualar o encontro (1-4). «O marcador foi avultado, pero ata ese instante estivemos a piques de equilibrar o partido. Estamos nunha categoría que castiga moito nos pequenos detalles», expón Alberto Rodríguez, técnico dos carballeses.
A esa capacidade de pelexar ata o final agárrase agora o Sofán, que hoxe busca en Abegondo (17.00 horas), ante o Fabril, a súa primeira vitoria da tempada. «Facendo balance global, a sensación que se rescata é que o equipo compite en cada partido e contra todos os rivais, de distinto caché», agrega Rodríguez, que afirma estar contento cos seus xogadores «a nivel de traballo e disposición», pero tamén cre que «non podemos estalo cos puntos e tampouco cos resultados».
A este respecto, o técnico do Sofán traballa para atopar un equilibrio defensivo, xa que en ataque si están a responder ben: dos cinco equipos que integran a zona baixa da táboa, Viveiro e Sofán son os máis prolíficos de cara ao marco contrario, con nove dianas. Para pólo en contexto, a Polvoreira, terceiro na clasificación, leva oito. Con todo, o Sofán recibiu dezaoito e iso pasoulle factura. Curiosamente, tres das súas derrotas chegaron pola mínima. «Hai unha cousa que nos está dando quebradizos de cabeza: vimos porta en todos os partidos pero encaixamos moito, así que estamos no proceso de equilibrar a balanza», sinala Rodríguez.
Dous descartes
Salvo o meta Álex López, que se recupera dunha lesión, Alberto Rodríguez poderá contar co resto de efectivos do persoal. Fabián Vidal, que non estivo dispoñible ante o Ourense CF pola súa expulsión ante o Choco, estará a disposición do equipo, que tamén ve como o centrocampista Juanjo, que xa sumou minutos na pasada xornada, gaña rodaxe.
En todo caso, Rodríguez deberá realizar dous descartes de cara ao choque de hoxe.