Prisión para un home denunciado en Carballo por abusos sexuais a unha menor

Un home foi enviado ao cárcere de Teixeiro investigado por un delito de abusos sexuais sufridos, supostamente, por unha menor e despois de que fose a nai presentase unha denuncia ante a Garda Civil de Carballo. A proxenitora presentou, paralelamente, unha segunda denuncia contra outros dous achegados por omisión de auxilio.

Os feitos, segundo relatou a nai, ocorreron fai ao redor dun ano, cando a menor residía coa familia paterna en Canarias . A mediados de xullo, a moza regresou ao municipio bergantiñán onde reside a súa nai. Fíxoo soa. Días despois veu un tío dela de visita. A familia desprazouse a fin de semana á Coruña de ruta turística. Xa de regreso, a moza solicitou a ese familiar o teléfono móbil para visualizar as fotos feitas na capital herculina coa idea de subilas ás redes sociais. A nai achegouse para ver as imaxes coa filla, e aí foi cando descubriu a existencia de vídeos e fotos da menor espida, e nalgúns casos mantendo relacións cun achegado.

A proxenitora non dixo nada do que vira, pero invitou o dono do teléfono móbil a dar unha volta por Carballo. Xa nun bar, díxolle que agardase na terraza que tiña que facer un recado urxente e foise directamente ao cuartel do instituto armado. O home foi detido e tras prestar declaración ante o titular do xulgado de garda foi enviado a prisión provisional, investigado por estes feitos, segundo confirmaron tanto a denunciante como a Garda Civil de Carballo.

---

---

---