Hai novidades nos persoais, os carnés, as datas de competición e as inscricións, así como nas directivas
28 jul 2021 . Actualizado ás 17:38 h.Continúan os movementos nos equipos de fútbol da Costa da Morte. En Primeira Galicia, o Soneira anunciou os seus dous primeiros reforzos. O corcubionés Paulo González Canosa chega do Baíñas para defender a portería. Doutro lado, o defensa Alejandro Vázquez Sendón, Jano, deixa o Volantes de Baño para sumarse ao proxecto vimiancés. Así mesmo, Sergio Pichón continuará sendo o apoio do adestrador Pedro Gómez. Por outra banda, o Dumbría vén de renovar ao defensa Samuel Quintáns, Kanario, en tanto que o Baio anunciou que se pon ao choio coa planificación da nova tempada.
Carnés, inscricións e xuntas
Xa na Liga dá Costa, o Cee continúa co episodio de renovacións. Nesta ocasión tocoulle ao porteiro Maikel Cambeiro, o traseiro Anxo Golpes, o centrocampista Jose Lago, Josiño, e os atacantes Bruno Romero , Luis Lojo e Adrián Canosa, Pate. Pola súa banda, o Corme informou de que traballa na campaña de socios, en tanto que o Ponteceso, de que xa ten o prazo de inscricións abertas nas diferentes categorías. Ao contrario, o Buño busca novos directivos á desesperada. Tres asembleas xerais leva celebradas no último mes. A máis recente, o pasado sábado. A finalidade, buscar directivos que ou ben acompañen á actual reitora ou a substitúan. E é que o pasado 26 de xuño tres membros dimitiron, quedándose deste xeito só dous á fronte. Marcháronse o presidente, David Souto, Jañoto; o vicepresidente, Ricardo Lista, e un vogal. Ao contrario, seguen o secretario Martín Bazar, Zinho, e o tesoureiro, Martín Torrado.
Na última asemblea, un grupo de persoas interesáronse en presentar unha candidatura, aínda que comunicaron que se tomarían un tempo para meditar a decisión. Desde a actual directiva trasladan que xa non haberá máis encontros deste tipo e que ata que non se coñeza a data oficial de inicio de liga para o equipo sénior, non tomarán unha decisión respecto diso sobre se continuar co proxecto iniciado na tempada 2019-2020 ou non. En todo caso, animan á xente a dar o paso e, para iso, informan de que a entidade goza dunha boa saúde económica, sen débedas.
Fútbol feminino e base
No fútbol feminino, a federación galega vén de publicar as datas de inicio das distintas competicións. O Bergantiños, que debutará en Primeira Galicia, arrincará o 3 ou o 10 de outubro. Acaba de confirmar a continuidade da gardameta Andrea Amil e da baixa da defensa Eva Carril. Pola súa banda, Cee, Paiosaco e Cerqueda arrincarán a Segunda o 10 de outubro. Tamén xa hai datas para o fútbol 7 séniores e as categorías inferiores.
Xa no fútbol base, o Bergan vén de presentar a Juanjo González como adestrador do cadete A de División de Honra. Chega do Victoria CF, onde estivo en Liga galega as últimas tres tempadas sendo, ademais, coordinador.
En fútbol sala, na categoría de Preferente galega, o Villa de Cee renovou aos atacantes Santi López e Aitor Pérez, os capitáns Javier García, Marroco, e Mario García, o porteiro Bruno Suárez e Kevin Fandiño. Pola súa banda, o Fisober feminino despide á porteira Lea Agra e a Mai Rodríguez, tamén integrante do cadro de persoal, e renova a Paula Fandiño, Ana Mouzo, Nuria Pose, Alba Carreira, María Pérez e Adriana Castro.