A casa dá raíña e Galitrips, dúas iniciativas recentemente inauguradas na Costa da Morte
09 may 2021 . Actualizado ás 05:00 h.David ten unha empresa de canles e Cristina leva toda a vida traballando nunha clínica dental. Hai un tempo, cando o pai dela estaba a piques de xubilarse e de deixar os animais, pensaron que poderían facer algo cuns galpóns que tiñan en Vilela (Nemiña-Muxía). Estaban a empezar a obrar cando explotou a pandemia e confinouse a toda a poboación, na primavera de 2020. «Pero xa estabamos metidos, así que decidimos tirar para adiante co proxecto», narra Cristina. Nin ela nin o seu marido tiñan experiencia previa, pero en Semana Santa inauguraron un complexo de apartamentos turísticos que, polo momento, está a funcionar bastante ben.
Con , A casa da reinaasí chamaron ao seu proxecto, súmanse a outros emprendedores que non se deixaron amedrentar por unha situación que, a priori, antollábase costa arriba e que continuaron adiante coas súas iniciativas, ampliando a oferta comercial, hostaleira e turística da Costa da Morte. «Dicíannos ‘estades tolos por metervos nisto', pero xa empezáramos e tiñamos que seguir para adiante», engade Cristina, ilusionada pola resposta ata a data: «Nesta zona, que está atraendo a moito turista ultimamente, que nós saibamos non había ningún negocio deste tipo». O apartamento é unha opción cada vez máis demandada pola privacidade que proporciona e «porque non te cruzas con ninguén, algo moi valorado dende que veu a pandemia», reflexiona a muxiana.
Galitrips
E dun proxecto que nin o covid puido frear, a outro que viu a luz como consecuencia da crise sanitaria. Daniel Trillo estaba a empezar cunha axencia de viaxes cando todo se complicou e empezaron a cancelarlle todas as reservas que tiña. Uniuse entón a un compañeiro, Sergio Picallo, que leva un hotel, para lanzar algo novo, diferente e factible para os tempos que corren.
Xuntos, deseñaron Galitrips, unha plataforma de xestión de aloxamentos turísticos. Así o explica Daniel: «Xestionamos os aloxamentos dende cero. Hai xente que xa ten o proxecto posto en marcha e precisa alguén que se encargue de levalo. Nós buscámoslle canles [de distribución], optimizamos o prezo e a venda... Nin sequera teñen que estar aquí. E por outro lado está a xente que quere empezar pero que non ten nin idea de por onde tirar. Nós orientámolos a nivel legal, pero tamén os asesoramos sobre como facer o espazo máis atractivo para os turistas e cousas así».
Trillo viaxara por numerosos puntos de Europa, traballando en materia de turismo rural sostible, e viu na Costa da Morte oportunidades para desenvolver ese concepto. «Esta comarca ten moito potencial para este turismo. Quen vai ir agora a eses sitios tan masificados? O rural está en alza», sostén este veciño de Cee.
Captación
Polo momento xestionan poucos aloxamentos, pero están en plena fase de «captación», visitando moitos inmobles e atendendo numerosas solicitudes. «Estamos contentos, porque xa antes de que se levante o estado de alarma a resposta está sendo moi positiva, mellor do que esperábamos». Tiveron, di, moito turista da propia comunidade. «Os galegos estamos descubrindo Galicia», reflexiona.
A idea con Galitrips é, ademais, que o consumidor reserve directamente a través do seu propio portal. De cara a un futuro próximo gustaríalles desenvolver outra ferramenta, como unha aplicación, pero polo momento están analizando as necesidades dos seus clientes para ofrecer algo que se adapte á demanda.