Xa son 57 as mulleres adheridas a este proxecto que reúne, visibiliza e pon en valor a formación e o traballo delas desde o rural
17 abr 2021 . Actualizado ás 05:00 h.Xornalistas, psicólogas, logopedas, sociólogas, expertas en mercadotecnia dixital, ilustradoras, escritoras, representantes políticas, enxeñeiras, avogadas... A data de onte, un total de 57 mulleres da Costa da Morte formaban xa parte dos directorios do programa Todas Nós, un espazo de encontro de profesionais femininas da comarca que naceu en marzo co fin de visibilizar e pór en valor o traballo e as achegas á sociedade destas mulleres que teñen como un dos seus denominadores comúns o haber nado ou residir nalgún dos concellos deste territorio. Trátase de crear rede, comunidade, colaboración, apunta a súa impulsora, Patricia Vaqueiro. Socióloga especializada en xénero cun posgrao en coaching e intelixencia emocional, é actualmente autónoma, directora de Nós Igualdade, consultora especializada en perspectiva de xénero. Non pode estar máis satisfeita da acollida.
Vaqueiro traballa en cuestións de igualdade e muller desde que se licenciou, e fíxoo inicialmente na Administración pública. Foi cando decidiu emprender cando se sumou a unha entidade de mulleres emprendedoras. Non a achou na comarca, senón que tivo que irse a unha de ámbito nacional: «Vin o poder da muller, da unión, do que pode crear o potencial xunto, colectivo, a capacidade de acompañarnos . Temos perfís moi distintos, pero moitas cousas en común».
«Que vexan que hai moitas mulleres facendo cousas, que elas se poden dedicar ao que queiran»
Fronte a esa tendencia a pensar que fose sempre está o mellor, ela expúxose que no rural desta comarca debía de haber mulleres moi formadas en distintos ámbitos, «das que non sabemos». Todas Nós, efectivamente, reuniu a moitas, nun territorio onde as posibilidades laborais e formativas son «menores»: «Trátase de crear sinerxías e de visibilizarnos. Se necesitas unha avogada, unha deseñadora, unha enxeñeira... aquí telas». A maiores do directorio Todas Nós, dirixido a mulleres con máis de cinco anos de experiencia, hai outro complementario, A Incubadora, para mozas recentemente graduadas ou con menos dese tempo no mundo laboral. Vaqueiro está moi contenta das adhesións neste último ámbito: hai zume novo e iso non deixa de marcar «referentes» para as nenas de hoxe: «Que vexan que hai moitas mulleres facendo cousas, que elas se poden dedicar ao que queiran».
Pódeo mostrar ben Melina Pazos, neta de emigrantes galegos a Brasil e afincada en Cee desde os 10 anos. Agora, con 26, e despois de cursar o bacharelato tecnolóxico, está recentemente graduada como oficial de máquinas da Marina Mercante, un sector no que predominan os homes e no que tamén se está formando a súa irmá, na rama de ponte. Mar e barcos sempre estiveron presentes nas súas vidas, aínda que non había unha tradición mariñeira na familia, di. Foi por influencia duns amigos dos seus pais como acabaron formándose neste ámbito, e contentas. «No meu caso, ao ser rama de máquinas, tamén hai futuro en terra», opina Melina, que agora, con todo, desexa embarcar. «Esta iniciativa de Todas Nós é unha forma de darnos visibilidade ás mulleres que, dalgunha forma, estamos aquí escondidas na Costa da Morte. Existen moitas profesionais no rural, facía falta algo así, para unirnos e axudarnos unhas a outras. Agora se quen son, de onde, no que traballan, sei a quen acudir se necesito algo», expresa.
Entre as integrantes do proxecto hai así mesmo unha fotoperiodista con base en Istambul que na actualidade traballa cubrindo as reivindicacións de dereitos das mulleres turcas. Como Melina, tamén a nova xornalista ceense Paula Castiñeira integra A Incubadora. Agora mesmo ten en marcha un proxecto documental sobre a baleeira das Caneliñas. «A idea é fantástica, dános a coñecer a mulleres da zona e poden crearse ademais moitas sinerxías, fronte a ese pensamento de que se precisamos algo temos que ir ás cidades. Xa non só é visibilizarnos de cara ao resto do mundo, senón coñecernos entre nós, que tamén é moi importante», opina sobre estes directorios que, en realidade, son o comezo do camiño cara a accións futuras.
«Hai mulleres que eu coñecía de toda a vida e non tiña nin idea do que estaban facendo», sinala a ceense Andrea Díaz. Ela, xa na rama Todas Nós, ten 29 anos. Cursou Publicidade e Relacións Públicas e é experta en mercadotecnia dixital. «Sempre estiven bastante volcada co movemento feminista, e agora é un momento favorecedor», apunta. Reflexiona, tamén, sobre o que implica vivir nun determinado ámbito xeográfico, como a necesidade de mudarse cando un se vai estudar unha carreira, no caso da Costa da Morte. Por iso gústalle que este proxecto se centre na comarca e difunda o potencial deles desde o seu corazón: «Temos carreira, experiencia, buscámonos a vida para saír adiante». Ve moitas posibilidades de colaboración entre as participantes: «Non é unha cousa só dun día, só de hoxe». As interesadas, por suposto, poden seguir sumándose á iniciativa.