O Lubiáns, moi preto de asinar a clasificación matemática para a Ok Bronce
CARBALLO
Hockey sobre patíns | Os carballeses reciben hoxe ao Dominicos
18 ene 2020 . Actualizado ás 05:00 h.O Lubiáns ten hoxe a oportunidade de achegarse máis á clasificación matemática para disputar a Ok Bronce, liguiña que se xoga entre os tres primeiros equipos galegos da competición autonómica de hockey sobre patíns, os dous mellores de Asturias e os outros dous primeiros da liga do País Vasco e Navarra, e da que sae o conxunto que ascende á Ok Prata, a segunda máxima categoría a nivel español. O equipo carballés clasificouse por primeira vez para esta fase de ascenso recentemente creada a pasada tempada.
Recibe ao Dominicos, cuarto clasificado, cos mesmos puntos que o Ordes (34) e cun partido menos ambos. Os carballeses van segundos (40), a falta de tres xornadas por disputar. Unha vitoria deixaríaos practicamente clasificados.
O adestrador, Jorge Lamas, Cholo, falou onte da excelente tempada que están realizando os seus xogadores e do que se lles achega.
«Será un partido bastante complicado. Queremos firmala clasificación matemática canto antes. Ademais, ao ser na casa, é un aliciente máis», empezou dicindo. Insistiu nisto último: «Estamos tratando de convocar a toda a xente do club e de Carballo para encher as gradas». De feito, fixeron un cómic dos Vengadores ben gracioso para promocionar o importante duelo.
O técnico, que afronta a súa segunda campaña no banco bergantiñán, está moi contento co traballo realizado ata o momento: «Non só polos resultados, senón polo ambiente que hai e porque estamos xogando moi ben. Atopámonos cun xogo de equipo moi vistoso», expresou. Gañaron tres choques, empataron un e perderon tres.
O obxectivo, di, non era o de clasificarse para a fase de ascenso. Entón, se non se logra, non pasa nada. Agora ben, de conseguilo, pelexarán por «mellorar o posto do ano pasado e a imaxe, e por quedar cun bo sabor de boca», comentou. Na pasada campaña, resultaron últimos. No entanto, é coñecedor do complicada que é esa categoría intermedia, aínda sen coñecer os equipos que irán. Disputarase a partir da segunda metade de febreiro, calcula.
Persoal
Javier Fuentes , Samuel Cebeira, Manuel Ruibal, Fabián Suárez, Diego Vieites, Marcos Martínez, Antón Cobas, David Tato, Nelson Obelleiro, Xoán Villaverde, e Manuel Pardo, Ismael Pardiñas, David Castro e Fabián García (recentemente subidos do Lubiáns B) forman parte desta excelente tempada. Todos están dispoñibles para o partido de hoxe.