Teñen claro que, en caso de concretarse a medida, suporía un xerro de auga fría
04 dic 2019 . Actualizado ás 05:00 h.O posible peche de cinco postos da Garda Civil na Costa da Morte levantou bochas entre os alcaldes, que non queren nin oír falar dunha probable saída dos axentes do instituto armado dos seus municipios.
Cabe lembrar que a Dirección Xeral da Garda Civil, en Madrid, ten un informe elaborado desde hai meses cuxa finalidade pasa por reagrupar e reorganizar os postos, de tal forma que se queren facer máis grandes e con máis efectivos, iso si, a cambio de pechar os máis pequenos. Na comarca veríanse abocados ao peche os de Laxe, Malpica, Muxía, A Laracha e Camariñas.
«Pelexaremos porque non só se evite unha posible marcha da Garda Civil, senón que se potencien os servizos, as patrullas, se cubran os cadros de persoal e, se é necesario, que as amplíen», apuntou o larachés, José Manuel López Varela. O seu homólogo laxense, José Luis Pérez, deixou claro que a unión fai a forza: «Temos que reunirnos os alcaldes dos concellos supostamente afectados e tomar medidas conxuntas para evitar que iso suceda porque non é positivo». O malpicán Walter Pardo Añón dixo que «unha vila sen servizos non é unha vila, e loitaremos para que a Garda Civil non marche de Malpica, pero tampouco de Muxía, Camariñas, Laxe ou A Laracha».