San Lorenzo e Camariñas continúan liderando a Liga dá Costa e Terceira
15 oct 2019 . Actualizado ás 05:00 h.Está de parabén o fútbol da comarca. Salvo en Terceira Nacional e Primeira e Segunda Galicia A Coruña, no resto de categorías nas que hai representantes, tanto masculinos como femininos, a Costa da Morte ten equipos situados na zona alta das clasificacións, mesmo como líderes. Sobre todo, desde que esta fin de semana o Soneira recuperou os mandos de Primeira Galicia Santiago-A Costa, aínda que empatado a puntos con outros dous equipos. Logrouno tras vencer pola mínima ao Negreira (1-0), cun gol de Ricardo Álvarez aos vinte minutos da continuación do partido nas Cabreiras.
Na Liga dá Costa, o San Lorenzo continúa líder en solitario, con dous puntos de vantaxe respecto ao segundo clasificado, o Ponteceso, tras golear a domicilio ao Cee: 0-4. Raúl Iglesias abriu o marcador aos seis minutos do inicio do duelo e Brais Cancela fixo o resto (minutos 8, 78 e 85).
O terceiro equipo da zona que defende un liderado é o Camariñas en Terceira A Costa. Gañou ao Outes por 2 a 0 cos tantos de Martín Tajes e Javier Antelo nos minutos 26 e 36. Os de Alberto Desiderio Suárez e Abel Barcia son os que teñen maior vantaxe respecto ao segundo clasificado, o Camelle: catro puntos.
A maiores, en Preferente, o Fisterra marcha terceiro, posto que permite disputar a fase de ascenso. Está sendo a súa campaña de regreso á categoría. Tamén en Segunda Galega feminina, o Bergantiños e o Cee están entre os primeiros postos dos Grupos 1 e 3, respectivamente. As de Gueli van cuartas, mentres que as ceenses, terceiras, cunha xornada menos disputada. Este último conxunto creouse esta tempada, do mesmo xeito que o Paiosaco, ao que tampouco lle vai nada mal no primeiro grupo. Defende a sexta posición. Esta fin de semana, as larachesas golearon ao Obreiro (8-0) cos tantos de Andrea Rodríguez, Estefanía Muíños (3), Naiara Magdalena, Leticia Santos e Ana García (2). Pola súa banda, as carballesas tamén venceron de forma contundente ao Amistade Meiras (6-3). Isabela Gabriela Bravo fixo un triplete ao comezo do encontro, e Cruz Sánchez, cun dobrete, e Tatiana Túñez, pecharon o electrónico. Para rematar, o Cee impúxose pola mínima ao Atlético Arousá (1-2) cun primeiro gol do equipo local en propia meta e outro de Sharay Caamaño.
Outros resultados que deixou a xornada foron os seguintes.
Primeira A Costa
Unión-Dumbría (0-1), con gol de Jose Marcote á media hora do inicio do choque. Piloño-Baio (0-2): os branquiazuis encaixaron dous tantos nos minutos 26 e 64.
Primeira A Coruña-Ferrol
Non se moveu o marcador no encontro disputado entre o Club do Mar de Caión e o Valdoviño (0-0).
Liga dá Costa
O Cerqueda venceu ao Cabana por 3 a 1. David do Río fixo dobrete e Iván Mato marcou o 3 a 0 de penalti. Os visitantes só lograron maquillar o resultado ao final co tanto de José Castro.
O Sporting Zas sufriu unha nova derrota, nesta ocasión contra o Castriz (3-2). Foi un gol en propia meta no engadido o que decantou a balanza para os locais. Polos visitantes marcaron Álvaro Cambeiro e Brais González.
O Muxía-Coristanco rematou 2-4; o Esteirana-Baíñas e o Lira-Malpica, 4-1, e o Muros-Buño, 4-0.
Segunda A Coruña
Retomaron a senda do triunfo os cadros cercedenses na última xornada. O Queixas dobregou ao Imperátor OAR (4-2), mentres o San Martiño fixo o correcta fronte ao Atlético San Pedro (0-1).
Terceira A Costa
O Camelle endosoulle catro goles a cero ao Ameixenda. O Castrelo-Nantón rematou 2-1. O Monte Louro-Porteño acabou como empezou (0-0). O Laxe levou un triunfo pola mínima fronte ao Sporting Seaia (0-1).