Fútbol | Liga dá Costa O Corme é líder e Iván Rojo , do Cerqueda, pichichi
11 sep 2019 . Actualizado ás 05:00 h.Arranque revoltoso da Liga dá Costa esta fin de semana, no que non faltou de nada. Corme, Ponteceso, San Lorenzo, Esteirana, Cerqueda, Muros e Malpica saíron vencedores e encabezan a táboa por esta orde, mentres que Cee, Castriz, Baíñas, Cabana, Lira, Coristanco e Sporting Zas resultaron perdedores e, por consecuente, pechan a clasificación. Buño e Muxía non pasaron do empate a ceros en Xaviña e merodean pola zona media.
As expulsións foron as grandes protagonistas da xornada inaugural. Houbo ata seis: catro por dobre amoestación e, dúas, por vermella directa. No choque que máis, no Cabana-Esteirana (1-3) disputado nas Redondas, que rematou con dous homes menos (un o adestrador) polo equipo visitante, e cun menos, polo local. Neste caso, as dos xogadores debéronse a aspectos puramente técnicos, mentres que a do míster respondeu a malos comportamentos.
Tamén houbo moitos penaltis. Ata cinco déronse en catro encontros. Houbo dous no Corme-Zas (5-1): un de cada lado.
Se se bota un ollo aos marcadores, predominaron así mesmo os resultados contundentes: San Lorenzo-Coristanco (3-1); Baíñas-Cerqueda (1-3), e Lira-Ponteceso (1-3), ademais dos mencionados con anterioridade. Só dous foron pola mínima (Malpica-Castriz, 1-0, e Muros-Cee, 2-1), e só un acabou en táboas (o disputado en Buño).
A nivel individual, houbo catro xogadores que xa destacaron na primeira xornada na faceta goleadora e, especialmente, un. El é Iván Rojo , carballés que chegou ao Cerqueda esta campaña procedente do Baio, e que na súa estrea coa camiseta branca fixo un triplete. Un dos tantos foi de penalti. Tampouco o cormelán Alejo faltou á súa cita co gol vestido de azul. É xa por excelencia uno dos pichichis da Liga dá Costa e, na pasada liga, tamén o foi da categoría. Un dos seus dous tantos tamén foi desde os once metros. Séguenlle na táboa de goleadores Raúl Lestón, do Esteirana, e Xuco, recentemente chegado do Coristanco ao Ponteceso, cos mesmos tantos, aínda que os catro foron de xogada.
Preséntase emocionante a próxima xornada, en principio fixada para o domingo. Durante o día de hoxe, a Real Federación Galega confirma os horarios definitivos. Cinco conxuntos están empatados a puntos na cabeza da táboa. E o que aínda é máis interesante: catro mesmo igualan gol average. Por todo isto, e tendo en conta os pichichis do momento, o Cerqueda-Corme será, sen dúbida, o choque da xornada. O equipo malpicán sempre dá o callo e, tras vencer ao Baíñas, un dos favoritos ao título, aínda se prevé máis forte. O outro duelo interesante será o Coristanco-Cabana, máximos rivais na pasada competición ligueira de Terceira Autonómica polo ascenso, sendo finalmente o cadro coristanqués o campión.