O Covadonga, primeiro rival do Bergantiños na fase de ascenso

Melissa Rodríguez
melissa rodríguez CARBALLO / LA VOZ

CARBALLO

BASILIO BELLO

O equipo asturiano foi o máximo goleador do Grupo 2 da Terceira División

20 may 2019 . Actualizado ás 23:07 h.

O Bergantiños xa coñece ao equipo que será o seu primeiro rival na ansiada loita polo ascenso a segunda B: o Covadonga, cuarto clasificado do Grupo 2 de Terceira División, pero cuns números moi similares aos logrados polo conxunto carballés, que quedou subcampión do grupo galego. Mesmo os supera na faceta goleadora: 80 tantos marcados fronte aos 58 do cadro rojillo.

O adestrador do Bergantiños, Miguel Figueira, valorou este luns o cruzamento de forma positiva: «Estamos contentos porque será unha viaxe cómoda, ao ser un rival próximo, sen ter que estar oito horas metidos no bus. Por outra parte, desta maneira, tamén se desprazarán máis afeccionados nosos ver o partido». Respecto do meramente deportivo, comentou que será unha eliminatoria «igualada»: «Aínda non teño moitas referencias, pero polo que me comentaron, é un equipo ofensivamente forte, e proba diso é que entre tres xogadores marcaron 50 dos 80 goles finais». «Vai ser un pase difícil, pero trataremos de estar á altura e, sobre todo, de aprender dos erros da eliminatoria do ano pasado», sentenciou.

E é que dos dezasete adversarios que lle podían tocar, asegurou non ter predilección por ningún: «A experiencia destes dous últimos anos nos que disputamos a fase de ascenso dime que o que verdadeiramente determinará o pase será o estado anímico no que chegues á eliminatoria e que trates de aproveitar os momentos dos encontros. O único que queriamos era un rival próximo e non ter que ir a Algeciras ou ás illas».

Disputará o partido de ida xa este domingo a domicilio (ás 12.00 horas no campo municipal Álvarez Rabanal), e o da volta, o día 2 de xuño, nas Eiroas.

Aínda queda unha longa semana de adestramentos por diante, pero o técnico agarda contar con todo o cadro de persoal para o primeiro asalto, coa dúbida de Rivera, que se recupera dunha escordadura de xeonllo. Este domingo, no último choque de liga no seu feudo contra o Alondras (0-1), deu minutos aos menos habituais.