Especialmente emotivo foi a homenaxe a Raquel Moreira e Virtudes Rodríguez
19 abr 2019 . Actualizado ás 21:54 h.O estilista Carlos Bardullas, natural da Ponte do Porto e experto nunha técnica de corte de pelo a dúas mans, confésase «nervioso» e «emocionado» momentos antes do seu gran desfile na Mostra. Ten a cara chea de purpurina, xa que el mesmo está a dar os últimos retoques ás modelos que levarán nuns instantes as creacións da súa colección Son do Mar, inspirada na Costa da Morte. Non son simples peiteados ou tocados rocambolescos, non, o que fai Bardullas son verdadeiras esculturas que as mozas portan con garbo -e con algunha dificultade pola virulencia das pezas- pola pasarela de Camariñas.
Tamén a xaponesa Noriko Hashizume, outra das grandes deseñadoras que xa desfilou, confesaba onte inspirarse nunha imaxe que se lle quedou gravada de Camariñas na súa primeira visita á localidade: o sol caendo sobre o mar desde o faro. Usou ese recordo como referencia á hora de confeccionar as súas kimonos de verán, nos que combinou liño artesanal xaponés e encaixe, dúas técnicas que, segundo a nipoa, «combinan moi ben, ao ser o encaixe de palillos tan fino e de tan alta calidade».
Talento xa consolidado con outro que se vai abrindo camiño, mans palilleiras sénior e júnior, vangarda e tradición... Podería dicirse que a Mostra está a ser este ano escenario de contrastes, de desmitificación, de profesionalización e de deixar atrás esa idea tan estendida que concibía ao encaixe como algo rancio e doutra época. Coas voces aveludadas e de raíz de Irma Macías e Guadi Galego, que ofreceron senllas actuacións na xornada de onte, conviviu a música pop alternativa da peculiar Billie Eilish, que acompañou os desfiles dalgúns dos novos deseñadores.
Á xornada inaugural da Mostra do Encaixe, o mércores, acudiron 1.200 persoas segundo as cifras baralladas pola organización; pero a asistencia onte non quedou atrás. «Está habendo moitísima xente, o desfile desta mañá estivo abarrotado», confesaba onte a alcaldesa, Sandra Insua, en relación á exhibición de Pequeencaixe , das encajeras sénior e de Carlos Bardullas. Animaba a rexedora, así mesmo, a tomar a Mostra «como desculpa» para visitar outros recunchos da Costa da Morte -«como Reira, o Castelo ou o Ézaro»- «e tamén para comer, que aquí cómese moi ben!», dicía onte Insua.
Primeira toma de contacto dos novos deseñadores coa pasarela da Mostra do Encaixe
Preto dunha trintena de novos deseñadores chegados de toda España, así como do veciño Portugal, bateranse estes días por algún dos catro premios outorgados no vixésimo sexto Concurso de Noveis Deseñadores de Moda, de 2.100, 1.200 e dúas de 600 euros (un darao o público). Onte tiveron a súa primeira aproximación á pasarela, con coleccións, como adoita ser habitual, en grao sumo rompedoras. Os gañadores coñeceranse o domingo.
A emotiva homenaxe a Raquel Moreira e Virtudes Rodríguez na Mostra do Encaixe
Antes de dar paso ao último desfile da xornada, rendeuse homenaxe a Raquel Moreira, técnica do Museo do Encaixe, e a Virtudes Rodríguez, presidenta da asociación de palilleiras Rendas, ambas tristemente falecidas a finais do ano pasado.