Xunta e Concellos, incluídos tres de Bergantiños, renovan o plan de transporte metropolitano ata o 2020
CARBALLO
O principal investimento realizaraa Infraestruturas, achegando 3,5 millóns, mentres que os 553.000 euros restantes terán que ser asumidos polos consistorios
19 mares 2019 . Actualizado ás 05:00 h.A comisión de seguimento do Plan de Transporte Metropolitano dá a Coruña acordou onte por unanimidade a renovación deste plan para o ano 2020, cun orzamento de algo máis de catro millóns de euros. Segundo este acordo, a Consellería de Infraestruturas e Mobilidade achegará 3,5 millóns, mentres que ao conxunto dos 17 concellos integrantes da área de transporte corresponderanlle preto de 553.000 euros. Na reunión estiveron presentes o director xeral de Mobilidade, Ignacio Mestre, así como o delegado territorial da Xunta, Ovidio Rodeiro.
Desde a Xunta indicaron que este plan permite viaxar na área da Coruña a través dun sistema de billete único e da coordinación entre o transporte interurbano e o bus urbano.
Importantes descontos
«Os usuarios que aboan as viaxes coa tarxeta de Transporte Metropolitano de Galicia acceden a descontos nas viaxes interurbanas e dispoñen de gratuidade nos transbordos co transporte urbano», lembraron. Grazas a este convenio prorrogado, tamén se pode acceder a descontos adicionais do 15 % para os usuarios recorrentes, é dicir, «aqueles que realizan máis de 40 viaxes ao mes», así como bonificacións para membros de familias numerosas, que poden ir desde o 20 ao 50 %, en función da categoría na que se inclúan.
Ademais, as persoas menores de 19 anos tamén poden viaxar de forma gratuíta no bus público empregando para o pagamento o cartón Xente Nova.
Un total de 17 concellos
Desde a Xunta lembraron que a área de transporte metropolitano da Coruña está integrada por un total de 17 concellos: A Coruña, Abegondo, Arteixo, A Laracha, Bergondo, Betanzos, Cambre, Carballo, Carral, Cerceda, Culleredo, Curtis, Miño, Oleiros, Ordes, Oza-Cesuras e Sada. Puntualizaron que este Plan de Transporte Metropolitano de Galicia tamén está a funcionar actualmente nas áreas de Ferrol, Santiago, Lugo, Vigo, cun total de 65 concellos incorporados.
O principal investimento realizaraa a Xunta, achegando 3,5 millóns, mentres que os 553.000 euros restantes terán que ser asumidos por 17 municipios que participan no plan de transporte da área.