As entidades Eduardo Pondal e López Abente, dá Costa da Morte, tamén tomaron parte neste encontro
17 mares 2019 . Actualizado ás 05:00 h.A biblioteca do Consello da Cultura Galega (CCG) vén de acoller un encontro de carácter informal cunha serie de fundacións galegas de ámbito literario, entre elas a Eduardo Pondal de Ponteceso e a López Abente de Muxía. De xeito xeral, tratábase de coñecer a súa situación e necesidades de cara a futuras colaboracións. É dende novembro, cunha primeira visita ao Museo do Pontevedra, que a actual executiva do CCG está a desenvolver encontros con estas entidades, tanto públicas como privadas.
Ademais das mencionadas, estiveron presentes neste encontro as fundacións Otero Pedrayo, Castelao, Vicente Risco, Rosalía de Castro, Carlos Casares, Manuel María de Estudos Galegos, Curros Enríquez, Álvaro Cunqueiro, Uxío Novoneyra, Penzol e Blanco Amor. Todas teñen varios denominadores comúns, segundo resaltan dende o Consello da Cultura Galega, como o estar vinculadas a figuras literarias e o ser entidades activas con dinamismo nos seus espazos xeográficos. Esta foi una primeira toma de contacto, con dobre obxectivo: dunha banda, mostrar o interese en coñecer de primeira man a súa situación e, doutra, informalos dunha serie de actuacións do organismo que poden ser de axuda na súa dinámica de traballo.
Rosario Álvarez, actual presidenta do CCG, explicoulles, ademais, que a institución dispón dunha serie de documentos de análise e avaliación que poden serlles de utilidade. Contoulles, tamén, que se organizan xornadas e sesións sobre asuntos que ben poderían ser do seu ámbito. Todo o exposto foi ben recibido polos presentes, que expuxeron problemáticas comúns relativas á formación dos seus profesionais ou á necesidade de buscar fórmulas de consecución de fondos europeos.
Acordouse, en último lugar, establecer un calendario de actividades, así como vías de contacto. Perfilarase, neste sentido, unha próxima xuntanza informativa sobre mecenado.