A contención dos topes e a demanda son a clave de prezos medios que roldan os seis euros o quilo
23 feb 2019 . Actualizado ás 05:00 h.Os bancos da confraría de Noia producen o 70 % do berberecho galego, unha supremacía que, ben administrada, permite controlar o mercado. Precisamente, iso é o que está facendo a entidade desde a reapertura da campaña o día 4. Ao dosificar a entrada de molusco nos circuítos de distribución -a práctica totalidade da venda é agora para fresco- o bivalvo acada uns prezos similares aos de decembro, cando a demanda era moito maior porque entre os compradores tamén había conserveiras.
A contención á hora de introducir o molusco no mercado, unida a un incremento da demanda, beneficia á que neste momento se erixe como segunda área produtiva de Galicia: a desembocadura do río Anllóns, na Costa da Morte. A trintena de produtoras sacaron máis de cinco toneladas este mes, polos que obtiveron máis de 30.000 euros, cando en febreiro do 2018 non venderon nin un só quilo.
Moi inferiores son as cotizacións en Carril, cun prezo medio de 2,08 euros, ou Rianxo, 1,35. Só Cabo de Cruz aproxímase, con 5,27.
A cotización media desde que comezou o mes sitúase nos 6,31 euros, só 0,26 céntimos menos que a do mesmo período de decembro, que foi de 6,57. A situación é moi distinta á rexistrada en febreiro do 2018, cando o valor medio foi de 4,31.
O motivo é que, desde a continuación da actividade, os topes son axustados: cinco quilos por tripulante no caso dos mariscadores de á boia e tres para os que faenan a pé.
Na cotización do xoves, a última desta semana, os prezos medios do molusco de terceira e cuarta oscilaron entre os 5 e os 3,74 euros, fronte aos 7,4 e 3,93 de decembro.
Boa campaña no estuario tras dous anos sen faenar en febreiro
As mariscadoras da desembocadura do Anllóns, entre Cabana de Bergantiños e Ponteceso, apenas lembran un mes de febreiro como leste. Nin o ano pasado nin o anterior chegaron a saír a faenar, pero nesta ocasión baixaron á ría dúas veces á semana, algo que non ocorría desde o 2015, aínda que ao ano seguinte tiveron un par de xornadas de labor.
Tampouco estiveron nada mal os prezos, moi parecidos aos de Nadal. A cotización estes días baixou un euro, de 6 a 7, en canto abriu Noia, que é a que manda na actividade das mariscadoras da desembocadura do río Anllóns, xa que é a ría barbancesa a que marca os prezos. A pesar de que coa actividade en Noia os compradores aplicaron unha pequena rebaixa, xusto antes de Nadal a cotización era case a mesma, xa que oscilou entre os 5 e os 7 euros.
De momento, non hai prazo para unha veda no Anllóns. As mariscadoras intentarán aproveitar que Noia pechará a finais de marzo para sacar partido. En principio, en Semana Santa porán de novo en marcha a depuradora para vender ao público en xeral.
«É un bivalvo cuxo consumo aumentou pola súa versatilidade á hora de cociñalo»
Ao presidente da Asociación Galega de Comercialización e Depuración de Moluscos, o cambadés Roberto Fariña, non lle sorprende o alto prezo do berberecho: «Pode que na última semana de campaña haxa picos maiores. A falta de berberecho é un problema e agardo que sexa posible recuperalo na ría de Arousa».
Fariña apunta que, de ser un marisco considerado menor, este molusco pasou a . «converterse nun produto estrela»A clave, explica, hai que buscala nos fogóns: «O consumo aumentou pola súa versatilidade á hora de cociñalo. No levante, en Cataluña e, incluso, no centro da Península, demándase moito máis que a ameixa branca, cuxa preparación é máis limitada. A nova cociña fixouse no berberecho».
Así mesmo, Fariña comenta que existe unha distribución homoxénea do bivalvo en todo o territorio español, algo que non sucede con outras especies: «A ameixa branca concéntrase máis nos mercados do interior».
Subliña que hai un aumento das vendas durante o verán, debido á chegada de cruceiros ao Mediterráneo, e indica que «a súa escaseza é un problema que se minimiza coa ameixa xaponesa».