Houbo numerosas queixas de usuarios pola carencia de medios desde o venres
12 feb 2019 . Actualizado ás 05:00 h.A primeira fase da folga promovida polos sindicatos de ambulancias, e que se desenvolveu desde o venres ata a medianoite de onte, deixou as súas secuelas na Costa da Morte. A metade dos vehículos medicalizados do 061 con base na Costa da Morte foron saboteados. En concreto, as dúas ambulancias situadas en Bértoa (Carballo) e a existente na Silva (Cerceda). Salváronse ata a data as existentes en Ponteceso, Vimianzo e Cee.
Estes actos vandálicos provocaron atrasos e cancelacións de traslados sanitarios e, de feito, durante a fin de semana non se puideron tramitar 21 altas no Complexo Hospitalario Universitario da Coruña por déficit de vehículos. E iso, a pesar de que a Xunta determinou o cumprimento obrigatorio duns servizos mínimos que garantían os traslados de pacientes. Houbo quen se enfrontou ao persoal das ambulancias para mostrar a súa desconformidade por como se estaban desenvolvendo as mobilizacións. Algúns afectados entendían que os traballadores deben reivindicar os seus dereitos, pero non á conta de prexudicar aos usuarios.
No que respecta á base do 061 en Bértoa, os dous vehículos sufriron pintadas xa o primeiro día de paro. O persoal continuou cos traslados programados ata que picaron as rodas das dúas ambulancias, a unha delas, estacionada diante do Chuac. O mesmo sucedeu co vehículo da Silva.
As centrais sindicais convocantes do paro (CIG, CC.?OO. e UGT) anunciaron novos paros para esixir un «convenio digno e un servizo público de calidade». Será do 18 ao 24 de febreiro, do 4 ao 10 de marzo e folga indefinida a partir do 20 de marzo.
Pola súa banda, a Fundación Pública Urxencias Sanitarias de Galicia-061 condenou estas sabotaxes e fai un chamamento «ao comportamento responsable e consecuente, ademais de esixir respecto aos bens e as persoas».