Axentes da Policía Nacional detiveron a dous homes por numerosos delitos contra o patrimonio nos aparcadoiros próximos ao Chuac e a avenida de Lamadosa
13 dic 2018 . Actualizado ás 05:00 h.Axentes da Policía Nacional detiveron a dous homes por numerosos delitos contra o patrimonio nos aparcadoiros próximos ao Chuac e a avenida de Lamadosa.
Un dos asaltantes actuaba xeralmente só e buscaba sempre a mulleres que accedían ao seu coche e deixaban o bolso apoiado no asento do copiloto, momento que aproveitaba para abrir a porta e agarrar con forza o bolso, chegando mesmo a forcexar e empregar a violencia, para fuxir do lugar nun monovolume subtraído a mediados de outubro.
O 11 de novembro, segundo informou a Policía Nacional, axentes que patrullaban pola zona de paisano e nun vehículo camuflado recibiron un aviso dun novo intento de roubo. Detiveron ao individuo cando conducía o coche roubado, que levaba matrículas diferentes na parte dianteira e traseira do vehículo, por delitos de roubo, furto, e falsidade documental. No transcurso da investigación, os axentes atribuíronlle ademais a comisión de tres roubos máis con violencia e outros tres de furto.
Ademais, identificaron a outro home, que foi detido unha semana máis tarde, o día 18, ao que se lle imputa a subtracción das chaves e o roubo do monovolume, utilizado nos roubos cometidos nas inmediacións o Chuac. Os arrestados, de 55 e 38 anos, foron postos a disposición xudicial. O máis novo foi de novo arrestado dez días despois, o 28 de novembro, por outros tres delitos de roubo con forza.