Familias de enfermos de cancro abrirán un piso de acollida na contorna do Chuac

A Asociación Galega de Trasplantados de Medula Ósea (Asotrame) quere pór en marcha un piso de acollida para os familiares destes enfermos. «Temos o piso que nos encaixaría e gustaríanos pólo en marcha canto antes», explica a súa presidenta e fundadora, Cristina Piñeiro. A cuestión da que están pendentes é o financiamento: «Habemos ir organizando eventos con este obxectivo e os fondos que temos agora chegaríannos para dous meses. Por iso estamos difundindo o proxecto, porque sabemos que é unha necesidade, pero necesitamos axudas».

O piso de acollida estaría na contorna do Chuac porque «practicamente todos os transplantes de medula ósea da provincia da Coruña fanse aí», explica Piñeiro. Neste sentido, argumenta: «Para moitas familias esta enfermidade supón un gran impacto, lévalles a modificar as súas rutinas e teñen que facer un importante desembolso de diñeiro sobre todo cando o domicilio particular está lonxe». No caso dos trasplantados de medula, pode supor máis dun mes no hospital para o paciente. Por iso, o piso de Asotrame está destinado a acoller a familiares coidadores «para que poidan durmir ou darse unha ducha». Tamén poderían beneficiarse «os pacientes que teñan que ir varios días ao hospital, pero sen necesidade de ingresar, porque moitos deles teñen que pagar un hostal durante eses días».

O piso que elixiron cubriría as necesidades de tres familias, aínda que «non queremos abrilo xa para logo ter que pechalo. Por iso gustaríanos ter un financiador», indica a presidenta desta asociación que leva funcionando desde fai catro anos. «A sensibilización sobre a doazón de medula ósea é un dos nosos programas máis fortes», sinala Patiño ao enumerar as actividades de Asotrame. Co fin de apoiar esa actividade divulgativa tamén elaboraron un conto sobre a doazón de medula para concienciar aos nenos.

---

---

---