Foi o hospital galego que máis doantes de órganos captou, e xa nota os bos efectos dos novos fármacos para a hepatite C
15 ene 2016 . Actualizado ás 05:00 h.O 2015 foi un bo ano en actividade de transplantes e captación de órganos no Complexo Hospitalario Universitario de Santiago (CHUS). Segundo datos da Oficina de Transplantes da Consellería de Sanidade, e da Unidade de Transplante Abdominal do Clínico (UTAB), realizáronse 80 transplantes, 17 máis que no 2014. Desa cifra, 44 foron de ril (20 máis que o ano anterior), que é a cantidade máis elevada deste tipo de enxerto desde que empezou a efectuarse en Santiago, na década dos oitenta. Os outros 36 foron de fígado, 3 menos que no 2014.
Tres dos enxertos renais foron de doante vivo. É dicir, unha persoa doou un ril a outra; e actualmente están en estudo varios casos máis, de momento entre familiares. Ademais, dous pacientes que estaban en lista de espera para ser trasplantados de fígado en Santiago, saíron desa situación ao experimentar unha importante melloría. Isto debeuse a que lles administraron os novos fármacos, efectivos para a hepatite C. O xefe da UTAB, Evaristo Varo, considera que é un dato positivo, pero aínda hai que agardar algún tempo para coñecer o impacto real deses tratamentos na lista de espera de transplante hepático: «Se se amplía o número de persoas beneficiadas por eses tratamentos, cun maior número de indicacións que as recoñecidas ata agora, probablemente o efecto sexa maior», sostén. Ademais, o último ano o CHUS foi o centro asistencial galego que captou máis doantes de órganos, 26 en total. Suman 8 máis que no exercicio anterior. Séguenlle o complexo hospitalario da Coruña, con 25; e o de Vigo con 24. Aínda que por cidades, Vigo situouse líder, pois no centro privado Povisa extraéronse tamén órganos a 4 pacientes. As negativas familiares para doar órganos de persoas falecidas no hospital que reúnen condicións descendeu ata o 22,7 % en Galicia. É das mellores acadadas desde 1996, pero aínda superior en varios puntos á media de España, onde as negativas son menores.
Reduciuse así mesmo a idade media das persoas falecidas a quen se extraeron órganos (61,6 anos en Galicia); e a causa do óbito é cada vez máis un accidente cerebrovascular (no 74,3 % dos casos) e redúcense as persoas falecidas tras un accidente de tráfico grave, apenas un 3,7 % dos doantes.
80
Transplantes
Dos que 44 foron de ril (20 máis que no 2014) e 36 de fígado (3 menos).
26
Doazóns de órganos
Son 8 máis que no 2014, e a cifra máis alta captada no 2015 por un hospital galego.