A manifestación pretende mostrar o seu rexeitamento ao financiamento dos combustibles fósiles que danan o medioambiente
15 oct 2019 . Actualizado ás 10:03 h.Centos de activistas polo cambio climático do grupo Extinction Rebellion tomaron este luns o centro financeiro de Londres para mostrar o seu rexeitamento a que as grandes corporacións financien os combustibles fósiles.
Moitos deles, protexidos da intensa choiva por lonas verdes ou paraugas, portaban bandeiras nas que se vía o logotipo de «Extinction Rebellion». Outros tocaban congas e algúns repartían folletos onde se lía «síntoo», explicando por que se manifestan.
Tamén mostraron pancartas con mensaxes contra as institucións financeiras e grandes corporacións nas que se instaba a deixar de «sufragar a crise climática». Durante a pasada semana, cando se iniciaron os actos, os activistas bloquearon o Parlamento británico e ocuparon o aeródromo City Airport.
Coas protestas de hoxe nas inmediacións do Banco de Inglaterra, o grupo pretende mostrar o seu rexeitamento ao financiamento dos combustibles fósiles que danan o medioambiente. A Policía Metropolitana de Londres (Met) efectuou varias detencións nos arredores da entidade financeira, onde bloquearon un concorrido cruzamento de tráfico.
No Reino Unido, Extinction Rebellion fixo un chamamento ao Goberno de Londres instándolle a declarar unha urxencia climática e ecolóxica, e a adoptar medidas inmediatas a fin de reducir as emisións de gas invernadoiro antes de 2025. Agárdase que esta semana ducias de activistas comparezan ante un tribunal, algúns deles en relación coa súa implicación en protestas levadas a cabo en abril.