Bruxelas investirá 116 millóns en 12 proxectos dedicados ao medio ambiente e a acción climática
BIODIVERSA GALICIA
As iniciativas do programa LIFE en España son coordinados pola Fundación Biodiversidade do Ministerio para a Transición Ecolóxica
15 feb 2019 . Actualizado ás 15:59 h.A Comisión Europea anunciou este venres o investimento de 116,1 millóns de euros para financiar doce proxectos enmarcados no programa LIFE para o medio ambiente e a acción climática en Austria , Bulgaria, República Checa, Estonia , Finlandia, Grecia, Hungría, Italia, Portugal e Eslovenia.
Os doce proxectos teñen un orzamento total de 215,5 millóns de euros, polo que o Executivo comunitario financiará máis do 50% do investimento necesario, segundo explicou nun comunicado a institución europea, que agarda que este montante xere 3.200 millóns de euros en investimentos adicionais.
En canto ás accións polo medio ambiente, Bruxelas concedeu 19,6 millóns, a dous proxectos en Bulgaria e Hungría que buscan reducir a contaminación atmosférica en núcleos urbanos. Ademais, destinaranse 44,2 millóns ao financiamento de proxectos de conservación da natureza en República Checa, Hungría, Portugal e Eslovenia e 19,9 millóns a dous proxectos en Austria e Hungría para a xestión de concas fluviais ante o risco de inundacións .
Con respecto aos proxectos dedicados á acción climática, a Comisión Europea financiará con 32,4 millóns a adopción de medidas en Finlandia, Italia e Eslovenia para cumprir os seus obxectivos nacionais de redución de emisións e unha estratexia de adaptación ao cambio climático a nivel local e rexional en Grecia.
O comisario de Medio Ambiente e Asuntos Marítimos e Pesqueiros, Karmeny Vella, destacou que estes novos investimentos «axudarán aos Estados membros a aproveitar os recursos para responder as preocupacións dos cidadáns sobre a calidade do aire e da auga e a parar a perda da biodiversidade».
En España os proxectos do programa LIFE son coordinados pola Fundación Biodiversidade do Ministerio para a Transición Ecolóxica.
O programa LIFE da Unión Europea púxose en marcha en 1992 e desde entón cofinanciou un total de 4.600 proxectos, dos que 1.100 están en marcha na actualidade. O orzamento actual do programa, para o período 2014-2020 é de 3.400 millóns e Bruxelas propuxo incrementalo un 60% no seguinte ciclo orzamentario (2021-2027).