Esta semana levarán a cabo actividades nos centros educativos de Ribeira, Boiro e A Pobra
11 nov 2025 . Actualizado á 18:45 h.Ribeira acolleu onte unha orixinal actividade que forma parte da campaña Cando teñas sede, marca tendencia, impulsada pola asociación Renacer con motivo do Día Mundial sen Alcol. O alumnado de primeiro da ESO do instituto Leliadoura participou na experiencia inmersiva Nas túas mans, un proxecto da Rede de Promoción da Saúde de Galicia (Regaps).
Equipados con lentes de realidade virtual, os estudantes mergulláronse nunha experiencia inmersiva, na que se viron ante situacións cotiás en primeira persoa. En cada escenario debían elixir como actuar, e as súas respostas marcaban o rumbo e desenlace da historia.
A actividade serviu como punto de partida para debater sobre temas que preocupan aos adolescentes —o consumo de alcol, a presión social, o uso das redes ou o acoso—, e para reflexionar sobre como as decisións persoais poden influír nun mesmo e nos demais.
A xornada concluíu cunha sesión de reflexión grupal, na que os participantes compararon as súas eleccións cos valores que seleccionaran ao comezo. Nun ambiente distendido, invitóuselles a compartir as súas impresións e abriron o debate sobre como as decisións, incluso as máis pequenas, poden ter consecuencias reais na súa contorna.
Con esta proposta, Renacer busca fomentar o pensamento crítico e a autonomía persoal, promovendo entre os mozos unha forma máis consciente e responsable de tomar decisións. A asociación indica que esta nova tecnoloxía permite achegar a promoción da saúde aos máis mozos dunha forma máis amena.
Esta actividade empezou cos institutos ribeirenses Leliadoura e Número 1, pero posteriormente estenderase a outros centros de Boiro e A Pobra. A campaña Cando teña sede, marca tendencia intensificarase ao longo da semana con alumnado de secundaria e do último ciclo de primaria, mediante o traballo cunha unidade didáctica nas aulas.
Difusión e concienciación
Isto completarase coa repartición da cartelería entre centros de saúde, o hospital, asociacións e instalacións educativas. Tamén se difundirán por redes sociais publicacións informativas e proxectaranse mensaxes nas pantallas repartidas por Ribeira, para chegar á poboación.
Esta iniciativa é un complemento aos contidos que se desenvolven ao longo do curso nos talleres de Renacer. Con motivo do Día Mundial sen Alcol a asociación antidroga busca concienciar de que o consumo destas bebidas atópase entre as causas de máis de 200 enfermidades. Aínda así está socialmente aceptado e estendido entre mozos e adultos: «Cunha escasa percepción de risco neles».