A evolución do covid continúa estable en Barbanza, a pesar de subir os casos na área sanitaria
RIBEIRA
Tres persoas continúan a tratamento no Hospital Clínico de Santiago
24 oct 2021 . Actualizado ás 12:38 h.A evolución do covid mostra unha radiografía practicamente plana na comarca de Barbanza, na que o único cambio na última xornada é a saída de Ribeira da lista de municipios sen novos casos a sete días. Si continúan nesta situación A Pobra do Caramiñal, Boiro Carnota, Porto do Son, Lousame e Mazaricos. Nos cinco últimos, ademais, tampouco se detectaron contagios nas últimas dúas semanas.
Con todo, na área sanitaria de Santiago e Barbanza si se rexistrou un lixeiro ascenso na cifra de afectados. En concreto, son seis máis as persoas con infección activa, o que eleva o número a 76.
Destes, só tres continúan a tratamento no Hospital Clínico de Santiago, cuxa unidade de coidados intensivos non ten a ningún ingresado.
Desde o inicio da pandemia, son 26.605 os afectados que superaron a enfermidade. A realización das probas PCR para detectar novos contagios segue á alza e, segundo os datos facilitados por Sanidade, na área sanitaria realizáronse xa 446.859 desde o comezo da crise sanitaria. Neste período, son máis de 27.000 os cidadáns que resultaron afectados. Polo que respecta ás probas de antígenos, elévanse a 165.503.