Certificados de profesionalidade, a saída ao mercado ao laboral menos coñecida

Hai uns anos, cando ás empregadas dos servizos de atención a domicilio empezou a esixir unha titulación para poder exercer o seu traballo, emerxeu un problema importante ao constatarse que unha amplísima porcentaxe desas mulleres, a pesar de contar con anos de experiencia, carecían dunha formación regulada que acreditase os seus coñecementos. Para resolver situacións como esta se crearon os certificados de profesionalidade, que permiten obter nuns meses un título oficial nun amplo abano de familias profesionais e que constitúen unha saída ao mercado laboral moi pouco coñecida en Barbanza.

Varias academias da comarca imparten este tipo de acreditacións, que permiten acceder a un título oficial con validez en todo o Estado. Un destes centros é o que dirixe Juan Arca, con sedes en Ribeira e Boiro nas que, ás actividades propias dunha academia ao uso, súmase a formación para acceder a certificados de profesionalidade en tres ámbitos: atención sociosanitaria en institucións sociais, operacións de sistemas informáticos e xestión de mercadotecnia e comunicación.

Arca explica que estas ramas de actividade contan cunha elevada demanda de traballadores e que cada vez se esixirán máis este tipo de acreditacións: «Hai moitas persoas con experiencia que non teñen titulación e en todas as profesións van esixir que teñas o certificado de profesionalidade ou unha titulación equivalente». É ademais, apunta, unha vía para atopar emprego: «Trátase de facilitar o acceso ao mercado laboral. Todos os anos, a medida que avanza o curso, hai baixas de alumnos por colocación».

Por módulos

José Antonio Suárez é o responsable da academia A Vocal Formación, outro dos centros acreditados en Ribeira para impartir os certificados de profesionalidade. El explica que outra das vantaxes desta formación é que é modular: «Os cursos divídense en unidades formativas, de maneira que se un alumno ten que abandonar porque encontra traballo ou por calquera outra razón, recibirá os diplomas que acreditan a formación recibida ata ese momento, non perde o traballo que leva feito». Aínda que hai prazas abertas a profesionais en activo, estas actividades están dirixidas fundamentalmente a persoas desocupadas e por iso están subvencionadas pola Consellería de Emprego e Igualdade e polo Ministerio de Traballo, e existe ademais a opción de acceder a bolsas para cubrir os gastos de desprazamento. Iso si, «hai que asistir ás clases, que combinan a modalidade presencial e telemática».

Nestes momentos, na Vocal Formación teñen aberta a convocatoria para obter o certificado de técnico de produtos, para a aplicación de biocidas e fitosanitarios, pero hai ata 26 familias profesionais nas que se pode acceder a este tipo de formación, que combina as clases teóricas con prácticas en empresas da zona, outra das claves de cara á inserción laboral de quen optan por esta vía: «Hai moitas persoas desempregadas e pouco formadas, e este tipo de acreditacións están orientadas á inserción no mercado laboral».

Existen tres niveles para a obtención dos certificados, aos que se pode optar en función da formación ou titulacións previas: o 1 non esixe máis requisitos que a maioría de idade; para cursar o nivel 2 debe terse a ESO; e para o 3, título de bacharelato ou ciclo superior. Superar cada chanzo dá acceso ao seguinte e permite abrir novas portas de cara a facilitar a procura de emprego.

Nesta idea incide Basilio Insua Lado, de CLT Consultores, en Ribeira, que destaca a oportunidade que supón que nestes momentos de crise «os traballadores desempregados fórmense para conseguir un posto de traballo digno ou emprender un proxecto, e os traballadores en activo tamén o fagan para mellorar o seu currículo e, desta forma, as súas aspiracións profesionais».

Ampla variedade

Neste sentido, Insua explica que o seu centro ofrece un amplo abano de certificados de profesionalidade subvencionados que permiten obter unha titulación oficial a nivel estatal en ámbitos que actualmente teñen unha elevada demanda de man de obra por parte das empresas, como organización do transporte e a distribución, programación de sistemas informáticos, organización e xestión de almacéns ou actividades administrativas en relación co cliente.

Claro que, aínda que os custos deste tipo de formación fináncianos Xunta e Goberno central, si teñen un prezo en canto a que requiren dedicación por parte dos alumnos. Por exemplo, a acreditación de operacións de sistemas informáticos que imparte a Academia Arca implica 800 horas de clases e 80 de prácticas. Con todo, os profesionais do sector creen que é unha gran ferramenta para a empleabilidad, como subliñan en CLT Consultores: «Toda formación require un esforzo, pero existe un mundo de oportunidades laborais que será aproveitado polos mellor formados».

---

---

---