Foi posto a disposición do xulgado, que decretou se ingreso en prisión
05 sep 2021 . Actualizado ás 18:26 h.Un ribeirense duns 45 anos de idade foi detido á primeira hora desta mañá acusado de intentar roubar en dous establecementos comerciais da capital barbancesa. De feito, nun deles logrou entrar e foi pillado in fraganti polas forzas da orde.
Ao parecer, nun primeiro momento o individuo tratou de coarse nun supermercado da rúa Rosalía de Castro, rompendo a porta acristalada coa tapa dun sumidoiro. Con todo, o buraco que provocou era demasiado pequeno e cortouse intentando entrar sen conseguilo.
Acto seguido, o home dirixiuse a unha tenda dedicada á venda de produtos de téxtil para o fogar situado na rúa Cristóbal Colón. Aí si logrou entrar, e intentou levar un nórdico e unha vintena de xogos de roupa de cama valorados en 200 euros cada un e toallas. Nese momento foi sorprendido pola Policía Local, que, en colaboración coa Nacional, procedeu á súa detención.
Ao home cónstanlle antecedentes por feitos similares, e tras ser posto a disposición do xulgado decretouse o seu ingreso en prisión.