Mancomunidade e Fundación Mar de Arousa suman forzas para potenciar a ruta da Traslatio
RIBEIRA
Quen realicen a travesía poderán selar as credenciais nos cinco portos deportivos dos municipios arousáns
04 ago 2021 . Actualizado ás 05:00 h.Inmersa na divulgación e posta en valor do Camiño A Orixe, que partindo de Corrubedo segue o percorrido do Apóstolo ata Santiago, a mancomunidade Barbanza Arousa deu un paso máis, posto que o percorrido marítimo ten nesta ruta de peregrinación un aspecto esencial. Así, a entidade supramunicipal que engloba aos municipios de Ribeira , A Pobra, Boiro e Rianxo, subscribiu onte unha alianza coa Fundación Mar de Arousa Río Ulla. O acordo está destinado a potenciar desde a mancomunidade o percorrido da Traslatio.
O acto oficial tivo lugar na casa consistorial rianxeira cos presidentes de ambas as entidades, o alcalde Adolfo Muíños e Javier Sánchez-Agostiño, como protagonistas. Acompañándoos neste importante momento de suma de forzas tamén estiveron representantes dos restantes concellos da mancomunidade arousá. Así, acudiron o rexedor de Boiro, José Ramón Romero ; a edila de Cultura da Pobra, Patricia Lojo; e o concelleiro de Turismo de Ribeira, Ramón Doval.
Por parte de Barbanza Arousa, que estivo representada polo seu xerente, Fátima Cachafeiro, e pola técnica Patricia Miralles, subliñouse que este convenio constitúe un compromiso de colaboración para a posta en valor desta travesía marítima, que simboliza o traslado dos restos do Apóstolo a Compostela.
As cartillas
Os cinco portos deportivos repartidos pola marxe norte da ría de Arousa contarán con información sobre o percorrido da Traslatio. Os visitantes poderán selar neles as súas cartillas náuticas, de forma que os peregrinos obterán, á súa chegada a Padrón, o diploma acreditativo da execución dun traxecto que posúe unha longa implantación na zona.
No proxecto tamén participa a Asociación Galega de Actividades Náuticas, que estivo representada por José Manuel Fernández. A entidade colaborará implicando a turoperadores do ámbito náutico para a creación de paquetes turísticos.
A unión persegue atraer a maior número de visitantes á zona dándolles a coñecer o percorrido e fomentando a súa realización.
O presidente de Barbanza Arousa, Adolfo Muíños, subliñou que este é o único destino que permite obter a compostela por terra e por mar.