Propietarios de restaurantes de Barbanza: «Non lle vexo sentido ás medidas e non considero que sexa unha mellora para o meu local»

Os locais de hostalería que teñen licenza de restaurante poden abrir desde este venres ata as 23.00 horas, pero terano que facer baixo unhas condicións. Deberán levar un rexistro de clientes e contar cunha máquina que mida os niveis de dióxido de carbonou no interior do local. «Todo o que sexa ampliar o horario está ben. Pero, realmente axúdanos?», comentaba onte Antonio Alján desde o seu restaurante en Ribeira .

Á pregunta, el mesmo responde : «Pouco, porque ninguén quere cear e ter que acabar ás dez e media. A xente que estea nos bares vai querer vir aos restaurantes ata as once e como lle explicamos que teñen que rexistrarse e só se lles serve se cean». El xa ten o aparello necesario para medir a calidade do aire, aínda que non cre que sexa de utilidade: «Non lle vexo sentido ás medidas e non considero que sexa unha mellora para o meu local. Hai que cambiar contratos e horarios de persoal e non hai beneficio. Economicamente non resolve nada».

Tampouco Óscar Fernández, desde o seu negocio en Noia , era demasiado optimista: «Mellor sería poder abrir ata as doce, polo menos». El aguantará ata as 23.00 os venres e os sábados, aínda que «non sei se a xente virá a cear ou non. Aquí, ás nove e media aínda pega o sol e parece moi de día como para sentarse a cear». E en canto ao medidor de dióxido de carbono: «Pídeno de nove a once da noite, e parece que ao mediodía dá igual. No lle vexo ningunha utilidade».

Tanto Antonio como Óscar afirmaban este xoves que aínda non tiñan reservas para cear a fin de semana. O ribeirense comentaba que xa hai clientes que lle piden mesa para celebrar o Día da Nai: «Dicímoslles que teñen preferencia, pero que se estamos pechados non podemos facer nada. A ver como evoluciona a situación en Ribeira».

Un gasto a maiores

O medidor da calidade do aire é, ademais, visto como un gasto a maiores sobre o que as autoridades non se pronunciaron se será subvencionable ou non, como expresaba Noelia Rodríguez desde Outes, quen tamén critica o rexistro de comensais: «Podo dar ceas, pero teño que ser policía». Ademais, ve este paquete de medidas con receo: «Dache como a sensación de que é a antesala de que para a vindeira semana van sacar algo máis».

En Muros , José Senande sinalaba que «todo o que teñamos a maiores será benvido», aínda que considera que o horario de peche debería de estenderse «ata as doce, polo menos», xa que deixa pouca marxe para atender apropiadamente as ceas e que os comensais cumpran co toque de queda.

Tanto Senande como Rodríguez se acordan de hostaleiros que non contan con licenza de restaurante, pero tamén viven de servir comidas: «O estrés psicolóxico ao que está sometido algún compañeiro é brutal», comenta Senande.

Este é o caso de Jorge Matosián, que recentemente inaugurou o seu local en Boiro : «Para min, bar e restaurante son o mesmo». El cre que «as normas van a peor e xa non hai aforros para soster esta situación, que vai ser irrecuperable durante anos».

Outros, como o boirense Juan Vila, din que as medidas aprobadas dan «máis gastos dos que xa hai e estamos asfixiados. Eu vou quedar como estou». E restaurantes que estaban pechados, como o Don Paquito, non abrirán, polo menos, ata maio.

---

---

---