O alcalde, Manuel Ruiz Rivas, destacou a versatilidade de obra, denominada «Choiva, pedra e cristal»
15 may 2019 . Actualizado ás 21:36 h.Dúas grandes caixas de resonancia elevadas, unidas por un terceiro espazo, destinado a albergar as actividades de carácter rompedor, constitúen o deseño do futuro auditorio de Ribeira. O xurado hase decantado finalmente polo deseño presentado polo estudo de arquitectura de Palma de Mallorca, unha obra realizada por Bernat Pons Vidal, Anna Gorrochategui Matas e Antoni Pons Cañellas. Os seus autores foron os encargados de dar a coñecer os detalles. O alcalde, Manuel Ruiz, destacou a versatilidade da obra, á que os seus artífices deron o nome de Choiva, pedra e cristal.
O edificio concíbese como dous volumes que xogan ao equilibrio e moldéase a través de xeometrías irregulares, xerando a imaxe de dúas rocas dun espigón ou de montaña, elementos naturais de Ribeira. Bernart Pons e Anna Gorrochategui explicaron que o seu obxectivo é que a sala principal do auditorio, con capacidade para máis de 500 persoas, teña un carácter singular. Tamén indicaron que todos os elementos visibles das estruturas forman parte da solución construtiva «ningún é meramente decorativo». O futuro auditorio tamén constará dunha sala polivalente máis pequena.
Ruiz Rivas subliñou a relación do edificio coa contorna, un aspecto que tamén destacaron os arquitectos ao dicir que hai dous elementos principais fose do recinto: «O soportal e unha lámina de auga que busca crear un espazo de reflexos entre praza e edificio».
Pouco mantemento
Outro aspecto destacado polos arquitectos, que agora dispoñen dun prazo de tres meses para elaborar o proxecto construtivo, é que se buscou o emprego de materiais que requiran pouco mantemento: «A parte acristalada concéntrase nun espazo». Así mesmo, isto permite que as salas principal e polivalente sexan como caixas herméticas nas que resulte sinxelo manter a climatización.
Así mesmo, Manuel Ruiz comentou que hai outros aspectos, relativos á operatividade, que se consideran moi adecuados, como «a facilidade para a carga e a descarga e a conexión entre vestiarios e camerinos».
A construción do auditorio será posible grazas aos fondos europeos recibidos polo Concello de Ribeira. Manuel Ruiz subliñou a calidade dos proxectos presentados, dos que se elixiron tres finalistas, entre os que estaba a proposta do estudo de Palma de Mallorca. Neste sentido, o alcalde explicou que se estuda a posibilidade de facer algún tipo de publicación que os recolla todos.
